બોલીવુડ અભિનેત્રી શિલ્પા શેટ્ટીના પતિ રાજ કુંદ્રા મુંબઈ પોલીસની આર્થિક ગુના શાખા (EOW) ના રડાર પર છે. સોમવારે કુન્દ્રાને એક હાઇ-પ્રોફાઇલ છેતરપિંડીની તપાસના સંદર્ભમાં પૂછપરછ માટે બોલાવવામાં આવ્યા હતા, જ્યાં તેમની પાંચ કલાક સુધી સખત પૂછપરછ કરવામાં આવી હતી. સૂત્રોએ જણાવ્યું હતું કે આ લાંબી પૂછપરછ દરમિયાન ઘણા ચોંકાવનારા ખુલાસા થયા છે.

 તપાસ અધિકારીઓને શંકા છે કે 60 કરોડ રૂપિયાની મોટી રકમ પાંચ અલગ અલગ કંપનીઓ - સતયુગ ગોલ્ડ, વિહાન ઇન્ડસ્ટ્રીઝ, એસેન્શિયલ બલ્ક કોમોડિટીઝ પ્રાઇવેટ લિમિટેડ, બેસ્ટ ડીલ અને સ્ટેટમેન્ટ મીડિયામાં 'ડાયવર્ટ' કરવામાં આવી હતી. રાજ કુન્દ્રાએ તેમના નિવેદનમાં આ રોકાણ સ્વીકાર્યું છે, પરંતુ તપાસકર્તાઓને શંકા છે કે આ નાણાંનો ઉપયોગ વ્યક્તિગત લાભ અને બિનજરૂરી ખર્ચ માટે કરવામાં આવ્યો હતો

હવે સૌથી મોટો પ્રશ્ન એ છે કે શું શિલ્પા શેટ્ટી પણ આ સમગ્ર મામલામાં સામેલ હતી? સૂત્રોએ સંકેત આપ્યો છે કે તપાસના આગામી તબક્કામાં શિલ્પાને પણ પૂછપરછ માટે બોલાવવામાં આવી શકે છે. જોકે હજુ સુધી તેમને કોઈ સમન્સ જારી કરવામાં આવ્યા નથી. પરંતુ બોલિવૂડના આ પાવર કપલ પર આવી રહેલા આ નાણાકીય સંકટથી સમગ્ર ઉદ્યોગમાં ગભરાટ ફેલાયો છે.

તપાસ દરમિયાન, કુન્દ્રાના બેંક રેકોર્ડમાંથી ઘણા રહસ્યો ખુલ્યા છે. લગભગ 25 કરોડ રૂપિયાના શંકાસ્પદ ખર્ચનો ખુલાસો થયો છે, જેમાં એક વેરહાઉસ પર 3.15 કરોડ રૂપિયા, પ્રસારણ પર 20 કરોડ રૂપિયા અને માટુંગામાં એક મોંઘા ભાડાના ઓફિસ માટે ચૂકવવામાં આવેલી મોટી રકમનો સમાવેશ થાય છે. આ ખર્ચ ઘણા પ્રશ્નો ઉભા કરી રહ્યા છે. શું આ પૈસા કોઈ ગેરકાયદેસર પ્રવૃત્તિ સાથે જોડાયેલા છે? શું આ કંપનીઓનો ઉપયોગ ફક્ત કાળા નાણાં છુપાવવા માટે જ થઈ રહ્યો હતો?

રાજ કુન્દ્રાને આવતા અઠવાડિયે ફરીથી EOW સમક્ષ હાજર થવા માટે કહેવામાં આવ્યું છે. આ કેસ હવે ફક્ત છેતરપિંડી પૂરતો મર્યાદિત નથી રહ્યો પરંતુ બોલિવૂડના ગ્લેમર પાછળ છુપાયેલા ઊંડા ષડયંત્ર તરફ ઈશારો કરી રહ્યો છે. રાજ કુન્દ્રા અગાઉ પોર્નોગ્રાફી કેસમાં જેલમાં જઈ ચૂક્યા છે. આ સાથે, તેઓ EDમાં પણ જઈ ચૂક્યા છે. હવે 60 કરોડના આ છેતરપિંડીના કેસમાં આગામી દિવસોમાં વધુ મોટા ખુલાસા થવાની અપેક્ષા છે.

ઉદ્યોગપતિ દીપક કોઠારીએ રાજ કુન્દ્રા પર કૌભાંડનો આરોપ લગાવ્યો હતો. ત્યારબાદ આર્થિક ગુના શાખા આ કેસની તપાસ કરી રહી છે. તેમનો આરોપ છે કે બેસ્ટ ડીલ ટીવી પ્રાઇવેટ લિમિટેડ કંપનીમાં રોકાણના નામે તેમની પાસેથી પૈસા લેવામાં આવ્યા હતા, પરંતુ તે પૈસા વ્યવસાયને બદલે બીજે ક્યાંક ઉપયોગમાં લેવામાં આવ્યા હતા