૧૭ સપ્ટેમ્બર, ૨૦૨૫: વડાપ્રધાન નરેન્દ્ર મોદીના ૭૫મા જન્મદિવસ પર દેશભરમાંથી અને વિદેશમાંથી શુભેચ્છાઓનો ધોધ વરસી રહ્યો છે. અમેરિકાના રાષ્ટ્રપતિ ડોનાલ્ડ ટ્રમ્પથી માંડીને દેશના મોટા વિપક્ષી નેતાઓ પણ તેમને શુભેચ્છા પાઠવી રહ્યા છે. પરંતુ, સૌથી વધુ ચર્ચામાં રહેલી શુભેચ્છા પૂર્વ ભાજપ નેતા અને હાલમાં તૃણમૂલ કોંગ્રેસના સાંસદ શત્રુઘ્ન સિંહાની છે. તેમની આ શુભેચ્છાએ રાજકીય વર્તુળોમાં ભારે ચર્ચા જગાવી છે કે શું 'શૉટગન' તરીકે ઓળખાતા શત્રુઘ્ન સિંહા ફરીથી ભાજપમાં પાછા ફરી રહ્યા છે?

શત્રુઘ્ન સિંહાએ તેમના ઇન્સ્ટાગ્રામ પર પીએમ મોદી સાથેના જૂના ફોટો શેર કરીને એક ભાવુક સંદેશ લખ્યો. તેમણે પીએમ મોદીને "મારા સાચા મિત્ર" કહીને જન્મદિવસની શુભેચ્છા પાઠવી અને તેમના સારા સ્વાસ્થ્ય અને લાંબા આયુષ્ય માટે પ્રાર્થના કરી. બીજી એક પોસ્ટમાં તેમણે લખ્યું, "એકવાર મિત્રો, તેઓ હંમેશા મિત્રો રહે છે." આ પોસ્ટ પર સોશિયલ મીડિયામાં અનેક ટિપ્પણીઓ આવી રહી છે. ઘણા યુઝર્સ પૂછી રહ્યા છે કે શું તેઓ ઘરે પરત ફરી રહ્યા છે. એક યુઝરે તો લખ્યું, "શું તમે મમતા બેનર્જીથી કંટાળી ગયા છો? ભાજપ સાથે સંબંધ તોડવાથી કયા નેતાને ફાયદો થયો છે?"

નોંધનીય છે કે, 'બિહારી બાબુ' શત્રુઘ્ન સિંહા અગાઉ ભાજપમાં એક અગ્રણી ચહેરો હતા. તેમણે અટલ બિહારી વાજપેયીની સરકારમાં કેન્દ્રીય મંત્રી તરીકે પણ સેવા આપી હતી. જોકે, ભાજપ તરફથી ટિકિટ ન મળતાં તેમણે બળવો કરીને મમતા બેનર્જીની તૃણમૂલ કોંગ્રેસનો હાથ પકડ્યો હતો. તેમણે આસનસોલ બેઠક પરથી જંગી બહુમતી સાથે લોકસભા ચૂંટણી જીતી હતી. તેમ છતાં, પીએમ મોદી સાથેના તેમના સંબંધો હંમેશા સૌહાર્દપૂર્ણ રહ્યા છે.

આ શુભેચ્છાએ ફરી એકવાર રાજકીય સમીકરણોમાં ગરમાવો લાવી દીધો છે. શું આ માત્ર એક મિત્રની શુભેચ્છા છે કે પછી 'બિહારી બાબુ'ની ભાજપમાં પુનરાગમનની શરૂઆત? આ સવાલનો જવાબ તો સમય જ આપશે.