જો તમે સફારીનો આનંદ માણવા ઈચ્છો છો, તો ટૂંક સમયમાં જ તમને કેન્યાના જંગલોમાં ઉબેરની સુવિધા મળી શકે છે. વૈશ્વિક રાઈડ-હેલિંગ કંપની ઉબેરે નૈરોબીમાં 'ઉબેર સફારી' લોન્ચ કરી છે. આ સેવા ખાસ કરીને એવા પર્યટકો માટે શરૂ કરવામાં આવી છે જેઓ ઓછો સમય ધરાવે છે અને ઝડપી સફારીનો અનુભવ કરવા માંગે છે.

ઉબેર સફારી કેવી રીતે કામ કરશે?

• પ્રી-બુકિંગ: પર્યટકો ઉબેર એપ પર દિવસ અથવા રાત્રિની સફારી માટે પ્રી-બુકિંગ કરી શકશે.

• ગાઇડેડ ટૂર: આ સેવામાં ત્રણ કલાકની ગાઇડેડ ટૂરનો સમાવેશ થાય છે. આ દરમિયાન સિંહ, ગેંડા, ભેંસ અને ચિત્તા જેવા વન્યજીવોને જોવાની તક મળશે.

• સ્થાનિક પ્રવાસીઓ પર ધ્યાન: ઉબેરનો હેતુ સ્થાનિક અને વ્યવસાયિક પ્રવાસીઓને આકર્ષવાનો છે, જેઓ નૈરોબીમાં ટૂંકા રોકાણ દરમિયાન પણ સફારીનો અનુભવ કરવા માંગે છે.
 
પ્રવાસન અને અર્થતંત્રને લાભ
કેન્યા માટે પ્રવાસન આવકનો મુખ્ય સ્ત્રોત છે, જે દેશના કુલ સ્થાનિક ઉત્પાદનમાં ૧૦.૪% અને રોજગારમાં ૫.૫% ફાળો આપે છે. ઉબેરે નિવેદનમાં જણાવ્યું છે કે, આ નવી સેવા સ્થાનિક ટૂર ઓપરેટરો અને ફ્લીટ પાર્ટનર્સ માટે કમાણીની નવી તકો ઊભી કરશે, જેઓ પહેલાથી જ સફારી વાહનો ધરાવે છે અને આ ક્ષેત્રમાં કુશળતા ધરાવે છે. ૨૦૨૩માં ઉબેરનું કેન્યાના અર્થતંત્રમાં ₹૯૦૦ કરોડથી વધુનું યોગદાન રહ્યું હતું.

આ પહેલથી કેન્યાના પર્યટન ઉદ્યોગને વધુ વેગ મળવાની અપેક્ષા છે.