લંડન : અમેરિકાના રાષ્ટ્રપતિ ડોનાલ્ડ ટ્રમ્પને લંડન લઈ જઈ રહેલા એરફોર્સ વન વિમાન સાથે એક મોટી દુર્ઘટના ટળતા રહી. ન્યૂયોર્કના વ્યસ્ત એરસ્પેસમાં ઉડી રહેલું એરફોર્સ વન (બોઇંગ ૭૪૭) અને ફોર્ટ લોડરડેલથી બોસ્ટન જઈ રહેલું સ્પિરિટ એરલાઇન્સનું એક વિમાન (એરબસ A૩૨૧) એકબીજાની ખૂબ નજીક આવી ગયા હતા.
 
એર ટ્રાફિક કંટ્રોલરની સતર્કતાથી દુર્ઘટના ટળી
અહેવાલ મુજબ, એક સતર્ક એર ટ્રાફિક કંટ્રોલરે જોયું કે બંને વિમાનો સમાન ઊંચાઈ પર એકબીજાની તરફ આગળ વધી રહ્યા છે. તરત જ, કંટ્રોલરે સ્પિરિટ એરલાઇન્સના પાઇલટને માર્ગ બદલવા માટે કડક આદેશો આપ્યા.

રેડિયો પરના ઓડિયો રેકોર્ડિંગ્સ સોશિયલ મીડિયા પર વાયરલ થયા છે, જેમાં કંટ્રોલર સ્પિરિટના પાઇલટને ચેતવણી આપતા કહે છે કે, "ધ્યાન આપો, સ્પિરિટ ૧૩૦૦, ૨૦ ડિગ્રી જમણે વળો. આઇપેડ પરથી ધ્યાન હટાવો!" કંટ્રોલરે પાઇલટને રાષ્ટ્રપતિના વિમાનની નજીકતા વિશે પણ જાણ કરી, "સ્પિરિટ ૧૩૦૦, તમારા ડાબી પાંખથી ૬ માઇલ અથવા ૮ માઇલ દૂર ૭૪૭ છે. મને ખાતરી છે કે તમે જોઈ શકો છો કે તે કોણ છે."

અધિકારીઓએ પુષ્ટિ આપી છે કે બંને વિમાનોએ સલામત અંતર જાળવી રાખ્યું હતું અને કોઈપણ સુરક્ષાના નિયમનો ભંગ થયો નહોતો, તેમ છતાં આ ઘટનાએ ચિંતા ઊભી કરી છે.

ટ્રમ્પ તેમની યુકેની રાજ્ય મુલાકાત માટે મંગળવારે લંડન પહોંચ્યા હતા, જ્યાં તેઓ કિંગ ચાર્લ્સ સાથે મુલાકાત કરશે અને યુકેમાં ટેકનોલોજી રોકાણ અંગે ચર્ચા કરશે. આ ઘટનાએ એરસ્પેસમાં વાણિજ્યિક અને સરકારી વિમાનોનું સંચાલન કેટલું પડકારજનક છે તે ફરી એકવાર સાબિત કર્યું છે.