પટના: ભારતીય ચૂંટણી પંચે મતદાતાઓની સુવિધા માટે એક ક્રાંતિકારી નિર્ણય લીધો છે. હવે ઇલેક્ટ્રોનિક વોટિંગ મશીન (EVM) પર ઉમેદવારના નામ અને ચૂંટણી પ્રતીક સાથે તેમનો રંગીન ફોટોગ્રાફ પણ છાપવામાં આવશે. આ પ્રક્રિયાની શરૂઆત આગામી બિહાર વિધાનસભા ચૂંટણીથી થશે અને ત્યારબાદ અન્ય તમામ ચૂંટણીઓમાં પણ આ નિયમ લાગુ કરવામાં આવશે.

ફોટો મૂકવાનું કારણ શું?
ચૂંટણી પંચે આ નિર્ણય એટલા માટે લીધો છે કારણ કે ઘણીવાર સમાન નામવાળા ઉમેદવારોને કારણે મતદારોમાં મૂંઝવણ ઊભી થાય છે. આ મૂંઝવણને કારણે, મતદારો ઘણીવાર ખોટા ઉમેદવારને મત આપી દે છે. આ સમસ્યાને દૂર કરવા માટે, EVM પર ફોટો મૂકવાથી મતદારો પોતાના પસંદગીના ઉમેદવારને સરળતાથી ઓળખી શકશે અને ચોક્કસ રીતે મતદાન કરી શકશે.
 
EVM પર અન્ય ફેરફારો:

• સ્પષ્ટ ઓળખ: ઉમેદવારના ચહેરા ફોટોની જગ્યાના ત્રણ-ચતુર્થાંશ ભાગ પર હશે, જેથી ચહેરો સ્પષ્ટ રીતે જોઈ શકાય.

• ફોન્ટમાં સુધારો: ઉમેદવારોના સીરીયલ નંબર અને NOTA (નન ઓફ ધ અબવ) વિકલ્પ મોટા ફોન્ટમાં છાપવામાં આવશે.

• સમાન ફોન્ટ: તમામ ઉમેદવારોના નામ અને NOTA સમાન ફોન્ટ અને ફોન્ટ સાઈઝમાં હશે, જેથી વાંચવામાં સરળતા રહે.

• ખાસ કાગળ: વિધાનસભા ચૂંટણીઓ માટે ૭૦ GSM વજનવાળા ખાસ ગુલાબી રંગના કાગળનો ઉપયોગ કરવામાં આવશે.

બિહાર વિધાનસભા ચૂંટણીની તારીખો આવતા મહિને (ઓક્ટોબર) જાહેર થવાની શક્યતા છે. આ નવા નિયમથી મતદાતાઓ માટે મતદાન કરવું વધુ સરળ અને ભૂલરહિત બનશે તેવી અપેક્ષા છે. બિહાર બાદ, ૨૦૨૬માં પશ્ચિમ બંગાળ, આસામ, કેરળ, પુડુચેરી અને તમિલનાડુમાં પણ આ પ્રક્રિયા અપનાવવામાં આવશે.