નવી દિલ્હી: લોકસભામાં વિરોધ પક્ષના નેતા અને કોંગ્રેસના સાંસદ રાહુલ ગાંધીએ 'વોટ ચોરી' વિશે 'હાઈડ્રોજન બોમ્બ' જેવા મોટા ખુલાસા કરવાની જાહેરાત કરી છે. તેના થોડા દિવસો બાદ કોંગ્રેસે જાહેરાત કરી છે કે તેઓ ગુરુવારે (૧૮ સપ્ટેમ્બર, ૨૦૨૫) પ્રેસ કોન્ફરન્સ યોજશે.
કોંગ્રેસના મીડિયા અને પ્રચાર વિભાગના પ્રમુખ પવન ખેરાએ X પર પોસ્ટ કરીને માહિતી આપી હતી કે, “લોકસભામાં વિરોધ પક્ષના નેતા શ્રી રાહુલ ગાંધીની આવતીકાલે સવારે ૧૦ વાગ્યે ઈન્દિરા ભવન ઓડિટોરિયમમાં વિશેષ પ્રેસ બ્રીફિંગ.” જોકે, તેમણે પ્રેસ કોન્ફરન્સનો મુદ્દો સ્પષ્ટ કર્યો ન હતો.
૧ સપ્ટેમ્બરના રોજ તેમની 'મતદાર અધિકાર યાત્રા'ના સમાપન કાર્યક્રમને સંબોધતા ગાંધીએ કહ્યું હતું કે તેમની પાર્ટી ટૂંક સમયમાં 'વોટ ચોરી' વિશે 'હાઈડ્રોજન બોમ્બ' જેવા ખુલાસા કરશે અને ત્યારબાદ વડાપ્રધાન નરેન્દ્ર મોદી દેશને મોં બતાવી શકશે નહીં.
ગયા મહિને, શ્રી ગાંધીએ ૨૦૨૪ની લોકસભા ચૂંટણીના ડેટાનો ઉલ્લેખ કરતા દાવો કર્યો હતો કે કર્ણાટકના મહાદેવપુરા વિધાનસભા ક્ષેત્રમાં હેરફેર દ્વારા એક લાખથી વધુ મત 'ચોરાયા' હતા. તેમણે ભારપૂર્વક કહ્યું હતું કે "વોટ ચોરી" એ "આપણી લોકશાહી પર પરમાણુ બોમ્બ" સમાન છે.
આ પ્રેસ કોન્ફરન્સ અને તેના સંભવિત ખુલાસાઓ રાજકીય વર્તુળોમાં ભારે ચર્ચાનો વિષય બન્યા છે. કોંગ્રેસ આક્ષેપને સમર્થન આપવા માટે શું પુરાવા રજૂ કરે છે તે જોવું રહ્યું.