૧૮ સપ્ટેમ્બર, ૨૦૨૫: લંડનના હાઈડ પાર્કમાં એક મહિલા પર બળાત્કાર કરવાના કિસ્સામાં એક ચોંકાવનારો ખુલાસો થયો છે. આ અપરાધ માટે જેલમાં ધકેલાયેલ ૪૨ વર્ષીય ઈજિપ્તીયન શરણાર્થી અબ્દેલરહેમેન અદનાન અબુએલેલા, વાસ્તવમાં એક દોષિત ઇસ્લામિક આતંકવાદી છે. આ સમાચારથી બ્રિટિશ સુરક્ષા તંત્ર અને શરણાર્થી નીતિ પર ગંભીર સવાલો ઉભા થયા છે.

કોણ છે આ શખ્સ?
અબ્દેલરહેમેન અદનાન અબુએલેલા મુસ્લિમ બ્રધરહુડનો સભ્ય છે, જેને ઘણા દેશોમાં આતંકવાદી સંગઠન ગણવામાં આવે છે. ઇજિપ્તમાં બોમ્બ બનાવતી એક સેલનો ભાગ હોવા બદલ તેને ૨૦૧૫માં તેની ગેરહાજરીમાં સાત વર્ષની જેલની સજા ફટકારવામાં આવી હતી. આ સજાથી બચવા તે ઇજિપ્તમાંથી ભાગી ગયો હતો.

૧૭ મહિનાની સુસ્તી અને એક ભયાનક અપરાધ
એપ્રિલ ૨૦૨૩માં અબુએલેલા તુર્કી થઈને ગેરકાયદેસર રીતે બ્રિટન પહોંચ્યો અને શરણનો દાવો કર્યો. બ્રિટિશ કાયદા મુજબ, જ્યાં સુધી તેની અરજી પર નિર્ણય ન થાય, ત્યાં સુધી તેને કરદાતાઓના પૈસે વેસ્ટ લંડનની એક ફોર-સ્ટાર હિલ્ટન હોટેલમાં રાખવામાં આવ્યો હતો.

ગૃહ કાર્યાલયના અધિકારીઓ તેની અરજી મંજૂર કરવી કે નહિ, તે અંગે ૧૭ મહિના સુધી વિચારણા કરતા રહ્યા. આ સુસ્તીના સમયગાળા દરમિયાન જ તેણે ગયા વર્ષે નવેમ્બરમાં હાઈડ પાર્કમાં એક સંવેદનશીલ મહિલા પર બળાત્કાર ગુજાર્યો.

સજા અને દેશનિકાલનો પ્રશ્ન
આ વર્ષે મે મહિનામાં સાઉથવાર્ક ક્રાઉન કોર્ટે તેને બળાત્કારનો દોષી ઠેરવ્યો અને મંગળવારે તેને સાડા આઠ વર્ષની જેલની સજા સંભળાવી. જજે પોતાના ચુકાદામાં સ્પષ્ટ કહ્યું કે, "તમે માત્ર તમારી જાતીય ઈચ્છાઓથી પ્રેરિત હતા અને મહિલાની નબળાઈનો લાભ લીધો."

સજા પૂરી થયા બાદ યુકે બોર્ડર્સ એક્ટ ૨૦૦૭ હેઠળ અબુએલેલાને દેશનિકાલનો સામનો કરવો પડશે. જોકે, એક અહેવાલ મુજબ તે માનવ અધિકારના કાયદાનો આધાર લઈને દેશનિકાલ સામે કાનૂની અપીલ કરી શકે છે, જે સુરક્ષા તંત્ર માટે એક મોટી ચિંતાનો વિષય છે.

શું સરકારી તંત્રની બેદરકારીને કારણે આવા ગુનેગારોને સમાજ માટે જોખમ ઊભું કરવાની તક મળે છે? આ સવાલ લંડનવાસીઓના મનમાં ઘૂમરાઈ રહ્યો છે.