નવી દિલ્હી: અદાણી જૂથના ચેરમેન ગૌતમ અદાણીએ હિંડનબર્ગ રિસર્ચના "પાયાવિહોણા" આરોપો પર SEBI (સિક્યોરિટીઝ એન્ડ એક્સચેન્જ બોર્ડ ઓફ ઇન્ડિયા) ના ચુકાદાને આવકાર્યો છે. તેમણે હિંડનબર્ગના રિપોર્ટને કારણે નુકસાન સહન કરનાર રોકાણકારો પ્રત્યે સહાનુભૂતિ વ્યક્ત કરી છે અને ખોટી વાતો ફેલાવનારાઓ પાસેથી માફીની માંગ કરી છે.
સોશિયલ મીડિયા પ્લેટફોર્મ 'એક્સ' પર એક પોસ્ટમાં ગૌતમ અદાણીએ લખ્યું, "વિગતવાર તપાસ પછી, સેબીએ એ વાતની પુષ્ટિ કરી છે જે અમે હંમેશા કહેતા આવ્યા છીએ કે હિંડનબર્ગના દાવાઓ પાયાવિહોણા હતા. પારદર્શિતા અને અખંડિતતા હંમેશા અદાણી જૂથની ઓળખ રહી છે."
તેમણે ઉમેર્યું, "આ છેતરપિંડી અને પૂર્વગ્રહયુક્ત રિપોર્ટને કારણે જે રોકાણકારોએ પૈસા ગુમાવ્યા, તેમનું દુઃખ અમે અનુભવી શકીએ છીએ. જે લોકોએ ખોટી વાતો ફેલાવી, તેમણે દેશની માફી માંગવી જોઈએ. ભારતની સંસ્થાઓ, ભારતના લોકો અને રાષ્ટ્રનિર્માણ પ્રત્યેની અમારી પ્રતિબદ્ધતા અડગ છે."
હિંડનબર્ગના આક્ષેપો પર SEBIનો આદેશ
ગુરુવારે, ૧૮ સપ્ટેમ્બરના રોજ, માર્કેટ રેગ્યુલેટર સેબીએ બે વર્ષ પહેલા હિંડનબર્ગ રિસર્ચ દ્વારા ગૌતમ અદાણી અને તેમની કંપનીઓ સામે કરવામાં આવેલા સ્ટોક મેનિપ્યુલેશનના દાવાઓને નકારી કાઢ્યા હતા. સેબીએ જણાવ્યું કે તે અદાણી અને અદાણી જૂથની કંપનીઓ, જેમાં અદાણી પોર્ટ્સ અને એસઈઝેડ લિમિટેડ તેમજ અદાણી પાવર લિમિટેડનો સમાવેશ થાય છે, સામેના આરોપોને 'સ્થાપિત' કરી શક્યું નથી.
સેબીના આદેશમાં પૂર્ણ-સમયના સભ્ય કમલેશ સી. વર્ષ્ણેયે જણાવ્યું કે, "આ મામલાને સંપૂર્ણ રીતે ધ્યાનમાં લીધા પછી, હું માનું છું કે શો કોઝ નોટિસમાં નોટિસધારકો સામે કરવામાં આવેલા આક્ષેપો સાબિત થયા નથી. આથી, નોટિસધારકો પર કોઈ જવાબદારી નક્કી કરવાનો પ્રશ્ન ઊભો થતો નથી, અને તેથી દંડની રકમ નક્કી કરવાનો પણ કોઈ અવકાશ રહેતો નથી."
હિંડનબર્ગ રિસર્ચે ૨૪ જાન્યુઆરી, ૨૦૨૩ના રોજ એક રિપોર્ટ જારી કરીને દાવો કર્યો હતો કે અદાણી ગ્રૂપની મુખ્ય કંપનીઓ, અદાણી એન્ટરપ્રાઈઝિસ અને અદાણી પાવર મુંદ્રા (હાલમાં અદાણી પાવર) ને ૨૦૨૦-૨૧માં માઇલસ્ટોન ટ્રેડલિંક્સ પ્રા. લિ. અને રેહવાર ઇન્ફ્રાસ્ટ્રક્ચર પ્રા. લિ. પાસેથી અદાણી ઇન્ફ્રા (ઇન્ડિયા) લિ. દ્વારા ભંડોળ મળ્યું હતું.