બાડમેર, રાજસ્થાન ૧૮ સપ્ટેમ્બર, ૨૦૨૫: બાડમેરના જિલ્લા કલેક્ટર અને IAS અધિકારી ટીના ડાબીએ દિવ્યાંગોને સન્માન અને સુવિધા પૂરી પાડવા માટે એક ઐતિહાસિક પહેલ કરી છે. તેમની આગેવાની હેઠળ, જિલ્લાની દરેક સરકારી હોસ્પિટલમાં 'વિકલાંગ સેવા મંદિર' સ્થાપિત કરવામાં આવશે. આનાથી દિવ્યાંગોને સારવાર અને સરકારી યોજનાઓ માટે વિવિધ કચેરીઓના ધક્કા ખાવાની ઝંઝટમાંથી મુક્તિ મળશે.
 
'વન-સ્ટોપ સેન્ટર'ની અનોખી કલ્પના
જિલ્લા કલેક્ટર ટીના ડાબીએ જણાવ્યું કે આ 'દિવ્યાંગ સેવા મંદિર' એક વન-સ્ટોપ સેન્ટર તરીકે કાર્ય કરશે. તેનો ઉદ્દેશ્ય દિવ્યાંગ વ્યક્તિઓને એક જ છત નીચે તમામ જરૂરી સેવાઓ પૂરી પાડવાનો છે. આ સેવાઓમાં તબીબી તપાસથી માંડીને દિવ્યાંગતા પ્રમાણપત્ર મેળવવા, પેન્શનની અરજી કરવા અને સાધનોના વિતરણ જેવી આવશ્યક સેવાઓનો સમાવેશ થાય છે.

આ પહેલની શરૂઆત પ્રથમ તબક્કામાં બાડમેર જિલ્લા હોસ્પિટલ અને તમામ સામુદાયિક આરોગ્ય કેન્દ્રોથી કરવામાં આવશે. જો આ પ્રયોગ સફળ રહેશે, તો તેને દરેક પ્રાથમિક આરોગ્ય કેન્દ્રમાં પણ લાગુ કરવામાં આવશે.

બાડમેર પ્રશાસનની આ નવીન પહેલને સમગ્ર રાજસ્થાન રાજ્ય માટે એક પ્રેરણાદાયક ઉદાહરણ તરીકે જોવામાં આવી રહી છે, જે દિવ્યાંગોના જીવનને સરળ બનાવશે અને તેમને સમાજમાં સન્માન અને સશક્તિકરણ પ્રદાન કરશે.

આ પહેલથી દિવ્યાંગોને થતી અગવડતાઓ દૂર થશે અને તેઓ સરળતાથી સરકારી લાભોનો ઉપયોગ કરી શકશે.