19 સપ્ટેમ્બર, 2025: શ્રીલંકાના ઉભરતા સ્ટાર સ્પિનર ડ્યુનિથ વેલાલાગે માટે અફઘાનિસ્તાન સામેની જીતની ખુશી, શોકમાં ફેરવાઈ ગઈ. પોતાની ટીમે શાનદાર પ્રદર્શન કરીને એશિયા કપની સુપર ફોરમાં સ્થાન મેળવ્યું, પરંતુ આ જીતની ઉજવણી વચ્ચે વેલાલાગેને તેના પિતા સુરંગા વેલાલાગેના અચાનક અવસાનના દુઃખદ સમાચાર મળ્યા. આ સમાચાર મળતા જ આ ૨૨ વર્ષીય યુવાન ખેલાડી રમત છોડીને પરિવાર સાથે રહેવા માટે તરત જ સ્વદેશ પરત ફર્યો છે.

ગુરુવાર, ૧૮ સપ્ટેમ્બરે અબુ ધાબીમાં શ્રીલંકાની ટીમે અફઘાનિસ્તાનને ૬ વિકેટે હરાવીને સુપર ફોરમાં પોતાનું સ્થાન પાકું કર્યું હતું. મેચ બાદની વિધિઓ પૂરી થયા પછી જ વેલાલાગેને આ કરુણ સમાચાર મળ્યા હતા. આ ઘટનાએ શ્રીલંકાના ક્રિકેટ જગતમાં શોકની લાગણી ફેલાવી દીધી છે, કારણ કે વેલાલેજ ટીમનો એક મહત્વપૂર્ણ ભાગ હતો.

જ્યારે શ્રીલંકાની ટીમ વિજયની ખુશીઓ મનાવી રહી હતી, ત્યારે વેલાલાગેની કારકિર્દીની આ અત્યંત મહત્વની ટુર્નામેન્ટ અચાનક અધૂરી રહી ગઈ. હાલ, તેની ટુર્નામેન્ટમાં ફરીથી જોડાવાની કોઈ શક્યતા નથી, જેના કારણે શ્રીલંકાની ટીમ માટે પણ આ એક મોટો ફટકો છે. શ્રીલંકાની ટીમ ૨૦ સપ્ટેમ્બરે બાંગ્લાદેશ, ૨૩ સપ્ટેમ્બરે પાકિસ્તાન અને ૨૬ સપ્ટેમ્બરે ભારત સામે ટકરાવાની છે. આ મુશ્કેલ સમયમાં વેલાલાગે અને તેના પરિવારને દુનિયાભરના ક્રિકેટ ચાહકો સહાનુભૂતિ અને ટેકો આપી રહ્યા છે.