નવી દિલ્હી: દિલ્હી યુનિવર્સિટી વિદ્યાર્થી સંઘ (DUSU)ની ચૂંટણીના પરિણામો આજે જાહેર થયા છે, જેમાં અખિલ ભારતીય વિદ્યાર્થી પરિષદ (ABVP) એ પ્રચંડ વિજય મેળવીને ચારમાંથી ત્રણ બેઠકો પર કબજો જમાવ્યો છે.

ABVPની જીતનો સપાટો:

* પ્રમુખ: આર્યન માન

* સચિવ: કુણાલ ચૌધરી

* સંયુક્ત સચિવ: દીપિકા ઝા

આ સાથે જ, NSUI ને માત્ર એક જ બેઠક (ઉપપ્રમુખ) પર વિજય મળ્યો છે. ઉપપ્રમુખ પદ પર NSUIના ઉમેદવાર રાહુલ ઝાંસલા વિજેતા બન્યા છે.

ચૂંટણીમાં ગરમાવો:
NSUIના રાષ્ટ્રીય અધ્યક્ષ વરુણ ચૌધરીએ આ પરિણામો બાદ સોશિયલ મીડિયા પ્લેટફોર્મ 'X' પર ચૂંટણીમાં ગોટાળાનો આરોપ લગાવ્યો છે. તેમણે કહ્યું કે, "EVM સાથે છેડછાડ કરીને અને DU વહીવટીતંત્ર, દિલ્હી સરકાર, કેન્દ્ર સરકાર અને દિલ્હી પોલીસની સંયુક્ત શક્તિનો ઉપયોગ કરીને ચૂંટણીમાં ગોટાળા કરવાનો પ્રયાસ કરવામાં આવ્યો." તેમ છતાં, તેમણે NSUIના વિજયી ઉમેદવારોને અભિનંદન પાઠવ્યા.

આ વર્ષે DUSU ચૂંટણીમાં ચાર મુખ્ય પદો માટે ૨૧ ઉમેદવારો મેદાનમાં હતા. ગુરુવારે થયેલા મતદાનમાં ૩૯.૪૫% મતદાન નોંધાયું હતું, જેમાં ૫૨ કેન્દ્રો પર ૭૧૧ EVMનો ઉપયોગ કરવામાં આવ્યો હતો.