ઓટાવા, કેનેડા:  કેનેડામાં કામ કરતા વિદેશી નાગરિકો માટે સારા સમાચાર છે! હવે તેમના જીવનસાથીઓ અને કોમન-લો પાર્ટનર્સ પણ ઓપન વર્ક પરમિટ (OWP) મેળવીને કેનેડામાં ગમે તે નોકરી કરી શકશે. આ પરમિટ મેળવવા માટે તેમને કોઈ ચોક્કસ નોકરીની ઓફર કે લેબર માર્કેટ ઈમ્પેક્ટ એસેસમેન્ટ (LMIA)ની જરૂર નથી, જે એક મોટી રાહત છે.
 
કોને મળશે આ ફાયદો?
આ નિયમ દરેક વિદેશી કામદારના જીવનસાથીને લાગુ પડતો નથી. તેની લાયકાતનો આધાર ઘણા પરિબળો પર રહેલો છે, જેમાં વિદેશી કામદારનો વ્યવસાય, તેમની પાસે કયા પ્રકારની વર્ક પરમિટ છે અને તેઓ કેનેડામાં કાયમી રહેઠાણ (PR) માટે અરજી કરવાના માર્ગ પર છે કે કેમ તે મુખ્ય છે.

પાત્રતાના મુખ્ય નિયમો:

* કાયમી રહેઠાણ (PR) માટે અરજી કરનારાઓ: જો કોઈ વિદેશી કામદાર કેનેડિયન એક્સપિરિયન્સ ક્લાસ, ફેડરલ સ્કીલ્ડ વર્કર પ્રોગ્રામ જેવા કાર્યક્રમો હેઠળ પીઆર માટે અરજી કરે છે, તો તેમના જીવનસાથીઓ અરજી કરી શકે છે, જો મૂળ કામદારની પરમિટ ઓછામાં ઓછા છ મહિના માટે માન્ય હોય.

* ઉચ્ચ-કુશળ કામદારો (TEER 0 અને 1): આ કેટેગરીના કામદારોના જીવનસાથીઓ અરજી કરી શકે છે, જો મૂળ કામદારની પરમિટ ઓછામાં ઓછા 16 મહિના માટે માન્ય હોય.

* ઓછી કુશળ કામદારો (TEER 4 અને 5): આ વર્ગના કામદારોના જીવનસાથીઓ પણ લાયક ઠરી શકે છે, જો મૂળ કામદાર પીઆરના માર્ગ પર હોય અને તેમની પરમિટ છ મહિના માટે માન્ય હોય.
 
કોણ અરજી નથી કરી શકતું?

કેટલાક કિસ્સાઓમાં, જીવનસાથીઓને OWP માટે લાયક ગણવામાં આવતા નથી:

* શરણાર્થી તરીકે દાવો કરનાર કે પછી દેશનિકાલનો આદેશ હોય તેવા વિદેશી કામદારો.

* આંતરરાષ્ટ્રીય વિદ્યાર્થીઓ જેમના જીવનસાથી પાસે વર્ક પરમિટ નથી.

* જેમના જીવનસાથી પાસે પહેલેથી જ OWP છે.
 
અન્ય જરૂરી શરતો

લાયકાત ઉપરાંત, જીવનસાથીઓએ કેટલીક અન્ય આવશ્યકતાઓ પણ પૂરી કરવી પડે છે:

* કેનેડામાં કાયદેસર રીતે રહેતા હોવાનો પુરાવો આપવો.

* પોતાના અને પરિવારના ભરણપોષણ માટે પૂરતું ભંડોળ હોવાનો પુરાવો બતાવવો.

* કોઈ ગુનાહિત રેકોર્ડ ન હોવો અને પોલીસ પ્રમાણપત્ર આપવું.

* જો જરૂરી હોય તો તબીબી પરીક્ષણ કરાવવું.

* પરમિટ સમાપ્ત થયા બાદ કેનેડા છોડી દેવાની ખાતરી આપવી.

આ નિયમો વિદેશી કામદારોને તેમના પરિવારને કેનેડામાં પોતાની સાથે રાખવામાં મદદ કરશે, જે કેનેડાની અર્થવ્યવસ્થા અને સમાજ માટે પણ લાભદાયી સાબિત થઈ શકે છે. જો તમે પણ કેનેડા જવાનું વિચારી રહ્યા હો, તો આ માહિતી તમારા માટે ખૂબ જ ઉપયોગી સાબિત થઈ શકે છે.