નવી દિલ્હી: : દેશના ત્રણ મહાનગરો – કોલકાતા, બેંગલુરુ અને મુંબઈ – માં હજારો ઘર ખરીદનારાઓ સાથે છેતરપિંડી કરનારા બિલ્ડરો વિરુદ્ધ સેન્ટ્રલ બ્યુરો ઓફ ઇન્વેસ્ટિગેશન (CBI) એ મોટી કાર્યવાહી હાથ ધરી છે. એજન્સીએ એકસાથે છ નવા કેસ નોંધ્યા છે અને 12 સ્થળોએ દરોડા પાડવામાં આવી રહ્યા છે.

CBI માત્ર બિલ્ડરો પર જ નહીં, પરંતુ નાણાકીય સંસ્થાઓ (Financial Institutions)ના અધિકારીઓ સાથે બિલ્ડરોની અપવિત્ર સાંઠગાંઠની પણ તપાસ કરી રહી છે.

'સબવેન્શન સ્કીમ' દ્વારા છેતરપિંડી
CBI ની આ કાર્યવાહી સુપ્રીમ કોર્ટના કડક નિર્દેશો બાદ કરવામાં આવી છે. એજન્સીએ જણાવ્યું કે ભારતભરમાં હજારો ઘર ખરીદનારાઓ બિલ્ડરો/ડેવલપર્સ દ્વારા છેતરપિંડીનો ભોગ બન્યા હતા અને રાહત મેળવવા માટે સર્વોચ્ચ અદાલતમાં પહોંચ્યા હતા.

સુપ્રીમ કોર્ટે એ નોંધ્યું હતું કે બિલ્ડરો અને નાણાકીય સંસ્થાઓએ 'સબવેન્શન સ્કીમ' (Subvention Scheme) જેવી નવી યોજનાઓ રજૂ કરીને ઘર ખરીદનારાઓને છેતર્યા હતા. આ મામલાઓને ધ્યાનમાં લઈને, કોર્ટે એપ્રિલ 2025માં CBIને સાત પ્રાથમિક પૂછપરછ (Preliminary Enquiries) નોંધવાનો નિર્દેશ આપ્યો હતો.

નિશાન પરના બિલ્ડરો:
NCRની બહારના બિલ્ડરો સામેની 7મી પ્રાથમિક તપાસ પૂર્ણ થયા પછી, CBI એ સુપ્રીમ કોર્ટને સ્ટેટસ રિપોર્ટ સુપરત કર્યો. આ રિપોર્ટના અવલોકન પછી કોર્ટે CBI ને છ નિયમિત કેસ (Regular Cases) નોંધવાનો આદેશ આપ્યો, જેમાં નીચેના બિલ્ડરો સામેલ છે:

• બેંગલુરુ સ્થિત: ઇથાકા એસ્ટેટ પ્રાઇવેટ લિમિટેડ, LGCL અર્બન હોમ્સ (ઇન્ડિયા) LLP અને ઓઝોન અર્બાના ઇન્ફ્રા ડેવલપર્સ પ્રાઇવેટ લિમિટેડ.

• મુંબઈ સ્થિત: શાશ્વતી રિયલ્ટી પ્રાઇવેટ લિમિટેડ અને ACME રિયલિટીઝ પ્રાઇવેટ લિમિટેડ.

• કોલકાતા સ્થિત: MKHS હાઉસિંગ LLP.

નોંધનીય છે કે NCR (નેશનલ કેપિટલ રિજન) માં વિવિધ બિલ્ડરો સામે CBI એ અગાઉ પણ 22 કેસ નોંધ્યા છે, જેની તપાસ હાલમાં સક્રિયપણે ચાલી રહી છે. હવે NCRની બહારના મોટા શહેરોમાં પણ એજન્સીએ ગાળિયો કસ્યો છે.