નવી દિલ્હી :રવિવારે અહિલ્યાનગરમાં એક સભામાં બોલતા કેન્દ્રીય ગૃહમંત્રી અમિતભાઈ  શાહે કહ્યું કે ભાજપ-શિવસેના સરકારે ઔરંગાબાદનું નામ બદલીને છત્રપતિ સંભાજીનગર અને અહમદનગરનું નામ બદલીને અહિલ્યાનગર કરવાનો ઐતિહાસિક નિર્ણય લીધો છે.

   તેમણે કહ્યું કે છત્રપતિ શિવાજી મહારાજના અનુયાયી જ આ સિદ્ધિ હાંસલ કરી શકે છે, કારણ કે ઔરંગઝેબના અનુયાયીઓમાં હિંમતનો અભાવ હતો. સભામાં અમિત શાહે મહારાષ્ટ્રના સહકારી ચળવળના પિતા પદ્મશ્રી વિઠ્ઠલરાવ પાટીલને પણ યાદ કર્યા.

    તેમણે કહ્યું કે વિઠ્ઠલરાવ પાટીલે વિશ્વની પ્રથમ સહકારી ખાંડ ફેક્ટરી સ્થાપિત કરીને ખેડૂતોને આર્થિક રીતે સશક્ત બનાવવામાં ઐતિહાસિક પ્રગતિ કરી. તેમણે કહ્યું કે વિઠ્ઠલરાવ પાટીલના વિઝનથી ખેડૂતો વેપારીઓને બદલે સીધા નફાના હકદાર બન્યા, જે એક મોટો ફેરફાર હતો.

  અમિતભાઈ  શાહે વધુમાં જણાવ્યું હતું કે મોદી સરકારે ખેડૂતોને રાહત આપવા માટે દસ હજાર કરોડ રૂપિયાથી વધુના આવકવેરા માફ કર્યા છે. તેમણે સમજાવ્યું કે અગાઉ, સમાધાન કાયદા ફક્ત કોર્પોરેટ ક્ષેત્રને લાગુ પડતા હતા, પરંતુ મોદી સરકારે પહેલીવાર સહકારી ક્ષેત્ર માટે સમાધાન કાયદો લાગુ કર્યો, અને તેને પાછલી અસરથી લાગુ કરવાનું ઐતિહાસિક પગલું ભર્યું.