નવી દિલ્હી :કેન્દ્રીય માર્ગ પરિવહન અને રાજમાર્ગ મંત્રી નીતિન ગડકરીએ જણાવ્યું હતું કે આગામી ચારથી છ મહિનામાં ભારતમાં ઇલેક્ટ્રિક વાહનો (EVs) ની કિંમતો પેટ્રોલથી ચાલતા વાહનો જેટલી જ થઈ જશે. ગડકરીએ કહ્યું કે ભારતની અશ્મિભૂત ઇંધણ પરની નિર્ભરતા આર્થિક બોજ છે, કારણ કે દેશ વાર્ષિક ₹22 લાખ કરોડ બળતણની આયાત પર ખર્ચ કરે છે. વધુમાં  તે પર્યાવરણ માટે ખતરો ઉભો કરે છે. તેથી, દેશના ટકાઉ વિકાસ માટે સ્વચ્છ ઉર્જા અપનાવવી જરૂરી છે. PTI અનુસાર ગડકરીએ FICCI ઉચ્ચ શિક્ષણ સમિટ 2025 માં તેમના સંબોધન દરમિયાન આ નિવેદન આપ્યું હતું.

રિપોર્ટ અનુસાર ગડકરીએ કહ્યું કે ભારતનું લક્ષ્ય આગામી પાંચ વર્ષમાં દેશના ઓટોમોબાઈલ ઉદ્યોગને વિશ્વમાં નંબર વન બનાવવાનું છે. તેમણે સમજાવ્યું કે જ્યારે તેમણે માર્ગ પરિવહન મંત્રાલયનો કાર્યભાર સંભાળ્યો ત્યારે ભારતીય ઓટોમોબાઈલ ઉદ્યોગનું કદ ₹14 લાખ કરોડ હતું, જે હવે વધીને ₹22 લાખ કરોડ થઈ ગયું છે.

વૈશ્વિક સ્તરે, અમેરિકામાં ₹78 લાખ કરોડ, ચીનમાં ₹47 લાખ કરોડ, જ્યારે ભારતમાં ₹22 લાખ કરોડનો ઓટોમોબાઈલ ઉદ્યોગ છે. ગડકરીએ એમ પણ જણાવ્યું હતું કે ખેડૂતોએ મકાઈમાંથી ઇથેનોલનું ઉત્પાદન કરીને અત્યાર સુધીમાં ₹45,000 કરોડની વધારાની કમાણી કરી છે, જે ભારતમાં વૈકલ્પિક ઉર્જા સ્ત્રોતો અપનાવવા તરફનું એક મોટું પગલું છે.

ભારતમાં ઇલેક્ટ્રિક વાહન બજારમાં ટાટા મોટર્સનું સૌથી મોટું વર્ચસ્વ છે. ઉદાહરણ તરીકે જો તમે ટાટા નેક્સનના પેટ્રોલ વેરિઅન્ટને ધ્યાનમાં લો, તો તેની પ્રારંભિક એક્સ-શોરૂમ કિંમત ₹731,890 છે, જ્યારે તે જ કારના ઇલેક્ટ્રિક વેરિઅન્ટની શરૂઆત ₹12.49 લાખ (એક્સ-શોરૂમ) થી થાય છે. આનો અર્થ એ છે કે બંને કાર વચ્ચે નોંધપાત્ર ભાવ તફાવત છે. પેસેન્જર વાહનો ઉપરાંત, અન્ય સેગમેન્ટમાં વાહનો વચ્ચે પણ નોંધપાત્ર ભાવ તફાવત છે. નીતિન ગડકરીના જણાવ્યા પ્રમાણે આવનારા વર્ષોમાં બંને વચ્ચેનો તફાવત સરખો થવાની ધારણા છે.