નવી દિલ્હી :  દિલ્હીના મુખ્યમંત્રી રેખા ગુપ્તાએ દિવાળીના તહેવાર પહેલા એક મોટો નિર્ણય લીધો છે. તેમણે જાહેરાત કરી છે કે દિલ્હી સરકાર ગ્રીન ફટાકડાના ઉપયોગની મંજૂરી મેળવવા માટે સુપ્રીમ કોર્ટનો દરવાજો ખખડાવશે.

CM રેખા ગુપ્તાએ માહિતી આપી હતી કે દિલ્હીના રહેવાસીઓની ભાવનાઓ અને દિવાળીના સાંસ્કૃતિક મહત્વને ધ્યાનમાં રાખીને ગ્રીન ફટાકડાના ઉપયોગ માટે પરવાનગી મળવી જોઈએ.

CM રેખા ગુપ્તાએ કહ્યું, "દિલ્હીવાસીઓને આ પરવાનગી મળવી જોઈએ, પછી ભલે તે ગ્રીન ક્રેકર્સના રૂપમાં મળે, જેથી તેઓ પોતાનો તહેવાર સારી રીતે મનાવી શકે."

વર્ષોથી દિલ્હીમાં પ્રદૂષણના ઊંચા સ્તરને કારણે ફટાકડાના ઉપયોગ પર નિયંત્રણો લાદવામાં આવ્યા છે. દિલ્હી સરકારનો આ નિર્ણય લાંબા સમયથી ફટાકડા પરના સંપૂર્ણ પ્રતિબંધથી નારાજ રહેલા નાગરિકોની લાગણીઓને શાંત કરવાનો પ્રયાસ છે, જેઓ પર્યાવરણને નુકસાન પહોંચાડ્યા વિના તહેવારની ઉજવણી કરવા માંગે છે. હવે જોવાનું એ રહે છે કે સુપ્રીમ કોર્ટ આ મામલે શું વલણ અપનાવે છે.