નવી દિલ્હી :ઇન્ટરનેશનલ મોનેટરી ફંડ (IMF)ના વડા ક્રિસ્ટાલિના જ્યોર્જીવાએ વૈશ્વિક અર્થતંત્રને લઈને ગંભીર ચેતવણી જારી કરી છે. એક થિંક ટેન્કમાં આપેલા ભાષણમાં IMFના મેનેજિંગ ડિરેક્ટર ક્રિસ્ટાલિના જ્યોર્જીવાએ જણાવ્યું હતું કે ભલે રાષ્ટ્રપતિ ડોનાલ્ડ ટ્રમ્પના ટેરિફ જેવા મોટા આંચકાઓ છતાં વૈશ્વિક અર્થતંત્ર હાલમાં અપેક્ષા કરતાં વધુ સારી સ્થિતિમાં છે, પરંતુ આ લવચીકતા કદાચ લાંબા સમય સુધી ન ટકે.

ક્રિસ્ટાલિના જ્યોર્જીવાએ ચેતવણી આપી હતી કે આ લવચીકતાની સંપૂર્ણ પરીક્ષા હજી બાકી છે અને ચિંતાજનક સંકેતો છે કે આ પરીક્ષા જલ્દી જ આવી શકે છે. જ્યોર્જીવાએ આવનારા જોખમનો ખુલ્લો સંકેત આપતા કહ્યું કે સોનાની વધતી વૈશ્વિક માંગ તરફ નજર કરવી જોઈએ. તેમનું આ નિવેદન એવા સમયે આવ્યું છે જ્યારે સોનાની કિંમતો પ્રથમ વખત $4,000 પ્રતિ ઔંસ પર પહોંચી ગઈ હતી. રોકાણકારો નબળા ડોલર અને ભૂ-રાજકીય અનિશ્ચિતતાથી બચવા માટે સુરક્ષિત રોકાણની શોધમાં છે, જે આ વધારા પાછળનું એક કારણ છે.

ટ્રમ્પના ટેરિફને લઈને જ્યોર્જીવાએ કહ્યું કે તેની સંપૂર્ણ અસર હજી સામે આવવાની બાકી છે. તેમણે ઉમેર્યું કે અમેરિકામાં માર્જિનમાં ઘટાડો થવાના કારણે કિંમતો પર અસર જોવા મળી શકે છે, જે મોંઘવારી વધારી શકે છે અને નાણાકીય નીતિ અને વૃદ્ધિ પર અસર કરી શકે છે. એપ્રિલમાં કેનેડા, મેક્સિકો, બ્રાઝિલ, ચીન અને નાના આફ્રિકન દેશ લેસોથો સહિત લગભગ તમામ અમેરિકન વેપારી ભાગીદારો પર ટેરિફ લગાવ્યા હતા. આ ટેરિફે વિશ્વભરમાં અનિશ્ચિતતા પેદા કરી છે.

જ્યોર્જીવાએ વિશ્વભરના યુવાનોમાં વ્યાપક અસંતોષ તરફ પણ ધ્યાન દોર્યું. તેમણે કહ્યું કે ઘણા યુવાનો એવા ભવિષ્યની કલ્પના કરી રહ્યા છે જ્યાં તેઓ તેમના માતા-પિતા કરતાં ઓછી કમાણી કરશે. આ યુવાનો પોતાની નિરાશાને રસ્તાઓ પર લઈને આવી રહ્યા છે અને તેઓ બધા વધુ સારી તકોની માંગ કરી રહ્યા છે. આ અસંતોષને કારણે એક નીતિગત ક્રાંતિને ગતિ મળી છે, જે હાલમાં વેપાર, ઇમિગ્રેશન અને ઘણા આંતરરાષ્ટ્રીય માળખાને નવો આકાર આપી રહી છે.

યુનાઇટેડ સ્ટેટ્સ માટે જ્યોર્જીવાએ સરકારને ફેડરલ દેવાની સમસ્યાનું નિરાકરણ લાવવા અને ઘરેલું બચતને પ્રોત્સાહિત કરવા વિનંતી કરી. ફેડરલ લોન 1925માં $380 બિલિયનથી વધીને 2025માં $37.64 ટ્રિલિયન થઈ ગઈ છે.