નવી દિલ્‍હીઃ  આતંકવાદને વર્ષોથી પોષનાર પાકિસ્તાન હવે તેના જ રચેલા આતંકવાદથી સતાવી રહ્યું છે. પાકિસ્તાનના ખૈબર પખ્તુનખ્વા પ્રાંતના ઓરકઝાઈ જિલ્લામાં પ્રતિબંધિત સંગઠન તહરીક-એ-તાલિબાન પાકિસ્તાન (TTP) એ એક મોટો આતંકવાદી હુમલો કર્યો છે, જેમાં પાકિસ્તાની સેનાને મોટું નુકસાન થયું છે. આ હુમલામાં એક લેફ્ટનન્ટ કર્નલ અને એક મેજર સહિત કુલ ૧૧ જવાનનાં મોત થયા છે.
પાકિસ્તાની સેનાની મીડિયા વિંગ, ઇન્ટર-સર્વિસિસ પબ્લિક રિલેશન્સ (ISPR), દ્વારા જારી કરાયેલા નિવેદન અનુસાર, ૭-૮ ઓક્ટોબરની રાત્રે અફઘાનિસ્તાનની સરહદ નજીક ઓરકઝાઈ જિલ્લામાં TTP ના આતંકવાદીઓની હાજરીના આધારે "ફિત્ના અલ-ખ્વારીજ" ઓપરેશન હાથ ધરવામાં આવ્યું હતું.
આ ભારે ગોળીબારના ઓપરેશન દરમિયાન સુરક્ષા દળોએ ૧૯ આતંકવાદીઓને ઠાર કર્યા હતા.    જોકે, આ અથડામણમાં પાકિસ્તાની સેનાએ બે વરિષ્ઠ અધિકારીઓ સહિત ૧૧ સૈનિકો ગુમાવ્યા છે.
TTP એ અનેક નાના-મોટા જૂથોનું ગઠબંધન છે, જેણે ૨૦૨૦ થી વિભાજિત જૂથોને ફરીથી એકઠા કર્યા છે. આના કારણે ખૈબર પખ્તુનખ્વા અને બલુચિસ્તાન જેવા પ્રાંતોમાં હુમલાઓમાં નોંધપાત્ર વધારો થયો છે.
નવા ડેટા અનુસાર, વર્ષ ૨૦૨૫ ના ત્રીજા ક્વાર્ટરમાં ખૈબર પખ્તુનખ્વા દેશનો સૌથી વધુ હિંસાગ્રસ્ત પ્રદેશ હતો. સેન્ટર ફોર રિસર્ચ એન્ડ સિક્યુરિટી સ્ટડીઝ (CRSS) ના આંકડા મુજબ, દેશમાં હિંસા સંબંધિત કુલ મૃત્યુમાંથી લગભગ ૭૧ ટકા અને ૬૭ ટકાથી વધુ હિંસાની ઘટનાઓ આ જ અફઘાનિસ્તાન સરહદ ધરાવતા પ્રાંતમાં બની હતી.