છત્તીસગઢના કાંકેરમાં એક અનોખો અને ચર્ચાસ્પદ કિસ્સો સામે આવ્યો છે, જ્યાં મહારાષ્ટ્રની એક આદિવાસી યુવતી સાથે લવ મેરેજ કરનાર યુવકને સમાજના નિયમોનું પાલન કરવાની માંગણી સાથે તેના પર અનોખી 'સજા' લાદવામાં આવી છે. આ યુવક જ્યાં રહે છે, તે છત્તીસગઢના કાંકેરના પીવી ૧૦૧ વિષ્ણુપુર ગામમાં મહારાષ્ટ્રના ભૂમકામ અને આસપાસના ૪૫ ગામોના લગભગ ૫૦૦ લોકો ધામા નાખીને બેઠા છે.

મહારાષ્ટ્રના ભૂમકામ ગામની રહેવાસી ૨૫ વર્ષની અલીસા પોટામી અને છત્તીસગઢના વિષ્ણુપુર ગામના રહેવાસી ૨૬ વર્ષના પ્રભાસ વિશ્વાસએ વર્ષ ૨૦૨૨માં કોર્ટમાં શપથપત્ર આપીને લવ મેરેજ કર્યા હતા. લગ્ન સમયે અલીસા પોટામી નર્સિંગનો અભ્યાસ કરી રહી હોવાથી તે સાસરે જવાને બદલે પોતાનો અભ્યાસ પૂરો કરી રહી હતી. અભ્યાસ પૂરો થયા બાદ તે ૧૦ દિવસ પહેલા જ યુવકના ઘરે વિષ્ણુપુર પહોંચી ગઈ હતી.

જ્યારે પુત્રી ઘરે ન પહોંચી, ત્યારે તેના પરિજનોએ પોલીસ સ્ટેશનમાં ગુમ થયાની ફરિયાદ નોંધાવી. પોલીસે તપાસ કરી યુવતીનું નિવેદન નોંધ્યું, જેમાં યુવતીએ જણાવ્યું કે તે પુખ્ત વયની છે અને તેણે પોતાની મરજીથી લગ્ન કર્યા છે. આથી, પોલીસે કેસ બંધ કરીને પરત ફરી હતી.

યુવતીના પરિજનોને જ્યારે તેના લગ્નની જાણ થઈ, ત્યારે તેઓ યુવકના ગામ વિષ્ણુપુર પહોંચ્યા. યુવતી આદિવાસી સમાજની હોવાથી ૪૫ ગામના આદિવાસી સમાજના લગભગ ૫૦૦ લોકો પણ વિષ્ણુપુર પહોંચી ગયા અને ત્યાં ધામા નાખ્યા.

સમાજના લોકોનું કહેવું છે કે તેમને લગ્ન સામે કોઈ વાંધો નથી, પરંતુ યુવકે આદિવાસી સમાજની પરંપરાનું પાલન કરવું પડશે. આદિવાસી સમાજની પરંપરા મુજબ, જ્યારે કોઈ યુવક બીજા સમાજની યુવતી સાથે લગ્ન કરે છે, ત્યારે જમાઈએ આદિવાસી સમાજના લોકોને બકરા-મુરગા (બકરો-મરઘો) અને ભાત ખવડાવવા પડે છે.

સમાજના લોકોએ સ્પષ્ટ કહ્યું છે કે જ્યાં સુધી જમાઈ આ ૫૦૦ લોકોને બકરા-મુરગા ભાત ખવડાવશે નહીં, ત્યાં સુધી તેઓ આ લગ્નને માન્યતા આપશે નહીં. 

જોકે, યુવકના પરિજનોએ સમાજના લોકોને બે લાખના બદલે  ₹૩૦,૦૦૦ આપવાની તૈયારી બતાવી છે, પરંતુ સમાજના લોકો શરત પૂરી કરવાની માંગ પર અડગ છે.