ટ્રમ્પનો દાવો....ભારત હવે રૂસ પાસેથી ક્રુડ નહિ ખરીદે
રૂસી ક્રુડને લઇને ટ્રમ્પનો મોટો દાવોઃ પીએમ મોદીએ મને ખાતરી આપી હોવાનું જણાવ્યું ટ્રમ્પે ફરી પીએમ મોદીના કર્યા વખાણઃ મોદી ‘‘મહાન'' વ્યકિત છેઃ મારા પરમ મિત્ર છેઃ નેતૃત્વને વખાણ્યું: અમારા વચ્ચે સારા સંબંધો છે
વોશિંગ્ટન તા.૧૬: અમેરિકાના રાષ્ટ્રપતિ ડોનાલ્ડ ટ્રમ્પે બુધવારે કહ્યું કે વડા પ્રધાન મોદીએ તેમને ખાતરી આપી છે કે ભારત હવે રશિયા પાસેથી તેલ ખરીદશે નહીં. ટ્રમ્પે આ નિર્ણયને રશિયાને આર્થિક રીતે અલગ પાડવા તરફ મોટું પગલુંૅ ગણાવ્યું. ટ્રમ્પે ફરી એકવાર ભારતને મહાન દેશ અને વડા પ્રધાન મોદીને સારા મિત્ર ગણાવ્યા. અમેરિકાએ આ વર્ષે જુલાઈમાં પહેલા ૨૫ ટકા પારસ્પરિક ટેરિફ લાદ્યો હતો, અને પછી ઓગસ્ટમાં રશિયા પાસેથી તેલ ખરીદવા બદલ દંડ તરીકે વધારાનો ૨૫ ટકા ટેરિફ લાદ્યો હતો. આનાથી ભારત પર કુલ ટેરિફ ૫૦ ટકા થયો.
વ્હાઇટ હાઉસમાં પત્રકારો સાથે વાત કરતા ટ્રમ્પે કહ્યું, હું ખુશ નહોતો કે ભારત રશિયા પાસેથી તેલ ખરીદી રહ્યું છે પરંતુ આજે વડા પ્રધાન મોદીએ મને ખાતરી આપી છે કે ભારત હવે આવું નહીં કરે. ટ્રમ્પે ઉમેર્યું, આ એક મોટું પગલું છે. હવે અમે ચીન પાસેથી પણ એવી જ અપેક્ષા રાખીએ છીએ.
વોશિગ્ટનમાં ભારતીય દૂતાવાસે વડા પ્રધાન મોદીએ ટ્રમ્પને આવું વચન આપ્યું હતું કે કેમ તે અંગે ઇમેઇલ દ્વારા મોકલવામાં આવેલા પ્રશ્નોનો જવાબ આપ્યો ન હતો. જો ભારત ખરેખર રશિયા પાસેથી તેલ ખરીદવાનું બંધ કરવાનું વચન આપે છે, તો તે વૈશ્વિક ઊર્જા રાજદ્વારીમાં એક મોટો વળાંક હોઈ શકે છે. આ એવા સમયે આવ્યું છે જ્યારે યુક્રેન યુદ્ધ દરમિયાન યુનાઇટેડ સ્ટેટ્સ રશિયાના તેલ આવકને રોકવા માટે તેના પ્રયાસોને તીવ્ર બનાવી રહ્યું છે.
જોકે, સમય જ કહેશે. ડોનાલ્ડ ટ્રમ્પ ભૂતકાળમાં ભારત વિશે અનેક ખોટા દાવા કરી ચૂક્યા છે. આ પહેલા તેમનો સૌથી ખોટો દાવો એ છે કે તેમણે ભારત અને પાકિસ્તાન વચ્ચે યુદ્ધવિરામનું આયોજન કર્યું હતું. ભારત સરકારે પહેલાથી જ કહ્યું છે કે ભારતે પાકિસ્તાનની વિનંતી પર યુદ્ધવિરામ શરૂ કર્યો હતો. રશિયન તેલ અંગે, ભારતે કહ્યું છે કે તે દબાણ હેઠળ નિર્ણયો લેશે નહીં.
ભારત લાંબા સમયથી કહે છે કે મોસ્કોથી તેની તેલ આયાત આર્થિક સ્થિરતા માટે જરૂરી છે, જ્યારે વોશિંગ્ટને નવી દિલ્હીને તેના ઉર્જાસ્ત્રેતોમાં વિવિધતા લાવવા વિનંતી કરી છે. અમેરિકાએ વારંવાર ભારત પર રશિયા પાસેથી તેલ ખરીદવા માટે દબાણ કરવાનો પ્રયાસ કર્યો છે. ભારત પર ૫૦% ટેરિફ આનું ઉદાહરણ છે. જોકે, ભારતે સ્પષ્ટપણે કહ્યું છે કે રાષ્ટ્રીય હિતો પહેલા આવે છે. ભારત દબાણ હેઠળ નહીં, પરંતુ પોતાના હિતોના આધારે નિર્ણયો લેશે.
આ નિર્ણય ભારતની નીતિમાં મોટો ફેરફાર દર્શાવે છે, જે રશિયાના સૌથી મોટા ઊર્જા ગ્રાહકોમાંનો એક છે, અને તે અન્ય દેશોની વ્યૂહરચનાઓને પણ અસર કરી શકે છે જે હજુ પણ રશિયન તેલ આયાત કરે છે. ટ્રમ્પ આ પગલાને બહુપક્ષીય પ્રતિબંધોને બદલે દ્વિપક્ષીય સંબંધો દ્વારા આર્થિક અલગતા લાગુ કરવાની વ્યૂહરચના તરીકે જુએ છે. પત્રકારો સાથેની વાતચીત દરમિયાન, ટ્રમ્પે એમ પણ કહ્યું કે ભારત રશિયા પાસેથી તેલ ખરીદવાનું તાત્કાલિક બંધ કરી શકતું નથી. તેમણે તેને નાનું પ્રક્રિયાગત કાર્ય ગણાવ્યું, પરંતુ ખાતરી આપી કે પ્રક્રિયા ટૂંક સમયમાં પૂર્ણ થશે.
અમેરિકન રાષ્ટ્રપતિ ટ્રમ્પે પીએમ મોદીની પ્રશંસા કરી, તેમને ૅમહાન વ્યક્તિૅ ગણાવ્યા. તેમણે એમ પણ કહ્યું કે યુએસ રાજદૂત-નિયુક્ત સર્જિયો ગોર અને પીએમ મોદી વચ્ચેની તાજેતરની મુલાકાતના સકારાત્મક પરિણામો પ્રશંસનીય હતા. ગોર અને પીએમ મોદીની વાતચીત કેવી રહી તે અંગે સમાચાર એજન્સી ANI દ્વારા પૂછવામાં આવેલા પ્રશ્નના જવાબમાં ટ્રમ્પે કહ્યું, મને લાગે છે કે તે ખૂબ જ સરસ હતું... મોદી એક મહાન વ્યક્તિ છે. તેમણે (સર્ગીયો ગોર) મને કહ્યું કે પીએમ મોદી મને (ટ્રમ્પ) પસંદ કરે છે.
રાષ્ટ્રપતિએ પીએમ મોદીના નેતૃત્વ હેઠળ ભારતની રાજકીય સ્થિરતાની પણ પ્રશંસા કરી અને યાદ કર્યું કે ભૂતકાળમાં, ભારતમાં વારંવાર નેતૃત્વ પરિવર્તનનો અનુભવ થયો છે. તેમણે કહ્યું, મેં વર્ષોથી ભારત જોયું છે. તે એક અદ્ભુત દેશ છે, અને દર વર્ષે નવા નેતાઓ આવતા હતા. કેટલાક થોડા મહિનાઓ માટે રહ્યા, અને આ વર્ષ-દર-વર્ષ ચાલુ રહ્યું, પરંતુ મારા મિત્ર (મોદી) લાંબા સમયથી ત્યાં છે.
(9:46 AM IST)
છેલ્લા 8 દિવસમાં સૌથી લોકપ્રિય 
