મધ્યપ્રદેશના સતના જિલ્લામાં એક યુવકની ઇન્સ્ટાગ્રામ પર વડા પ્રધાન નરેન્દ્ર મોદી અને ઉત્તર પ્રદેશના મુખ્યમંત્રી યોગી આદિત્યનાથની વાંધાજનક AI-જનરેટ કરેલી તસવીર પોસ્ટ કરવા બદલ ધરપકડ કરવામાં આવી છે. ટેકનિકલ પુરાવાના આધારે મજગવાન પોલીસે આરોપીની ધરપકડ કરી અને તેને કોર્ટમાં રજૂ કર્યો અને ત્યાર બાદ તેને જેલમાં મોકલી દેવામાં આવ્યો હતો. આ ઘટના જિલ્લાના મજગવાન પોલીસ સ્ટેશન વિસ્તારમાં બની હતી. આરોપીની ઓળખ મોહમ્મદ તસ્લીમ ખાન (24) તરીકે થઈ છે, જે મજગવાનનો રહેવાસી છે. આરોપીએ તેના ઇન્સ્ટાગ્રામ એકાઉન્ટ પર ખૂબ જ વાંધાજનક AI-જનરેટ કરેલી તસવીર શેર કરી હતી.
પોલીસના જણાવ્યા અનુસાર AI-જનરેટ કરેલી તસવીરમાં વડા પ્રધાન નરેન્દ્ર મોદી અને ઉત્તર પ્રદેશના મુખ્યમંત્રી યોગી આદિત્યનાથ હૈદરાબાદ લોકસભાના સાંસદ અસદુદ્દીન ઓવૈસીની પ્રતિમાના પગને સ્પર્શ કરતા દર્શાવવામાં આવ્યા છે. સોશિયલ મીડિયા પર પોસ્ટ થયા પછી આ તસવીર ઝડપથી વાયરલ થઈ ગઈ હતી. સ્થાનિક ભાજપ નેતાઓના ધ્યાન પર આવતા જ તેમણે સખત વાંધો ઉઠાવ્યો અને મજગવાન પોલીસ સ્ટેશનમાં ફરિયાદ નોંધાવી હતી.
મામલાની ગંભીરતા જોતાં પોલીસે તાત્કાલિક તપાસ શરૂ કરી હતી. સ્ટેશન હાઉસ ઓફિસર ધુર્વેએ જણાવ્યું હતું કે ટેકનિકલ પુરાવાના આધારે આરોપી મોહમ્મદ તસ્લીમ ખાનની ઓળખ કરવામાં આવી હતી અને તેની ધરપકડ કરવામાં આવી હતી.
પૂછપરછ દરમિયાન આરોપી તસ્લીમે પોલીસને જણાવ્યું હતું કે તેણે બીજા સોશિયલ મીડિયા એકાઉન્ટ પરથી ફોટો લીધો હતો અને તેને જાતે શેર કર્યો હતો. પોલીસે આરોપી સામે નિવારક પગલાં લીધા છે. તેની ધરપકડ બાદ તેને કોર્ટમાં રજૂ કરવામાં આવ્યો હતો, જ્યાં કોર્ટે તેને જેલ મોકલવાનો આદેશ આપ્યો હતો.