વર્લ્ડ ન્યૂઝ:  દિવાળીની ગુંજ : વિશ્વભરમાં આજે કરોડો લોકો દ્વારા પ્રકાશના મહાપર્વ દિવાળીની ભવ્ય ઉજવણી થઈ રહી છે, ત્યારે ત્રણ મહત્ત્વના દેશો – ઓસ્ટ્રેલિયા, ન્યુઝીલેન્ડ અને સિંગાપોર –ના વડાપ્રધાનોએ તેમના દેશવાસીઓ અને ભારતીય સમુદાયોને હૃદયપૂર્વક શુભેચ્છાઓ પાઠવીને તહેવારની ભાવનાને વૈશ્વિક સ્તરે પ્રસરાવી છે. ત્રણેય નેતાઓએ દિવાળીના મુખ્ય સંદેશ – અંધકાર પર પ્રકાશ અને નિરાશા પર આશાના વિજય – પર ભાર મૂક્યો હતો.

ઓસ્ટ્રેલિયન PM: ઉજ્જવળ ભવિષ્યની આશા
ઓસ્ટ્રેલિયાના વડાપ્રધાન એન્થોની અલ્બેનીસએ એક વિડિયો સંદેશમાં કહ્યું, "હું દરેકને દિવાળીની શુભકામનાઓ પાઠવું છું. પ્રકાશનો આ સમય તમને ઉજ્જવળ ભવિષ્ય માટે આશા અને ખુશીઓથી ભરી દે."

ભારતમાં, ઓસ્ટ્રેલિયન હાઈ કમિશને પણ પરંપરાગત પોશાક અને ગીત-નૃત્ય સાથે એક જીવંત દિવાળી ઉત્સવનું આયોજન કરીને સાંસ્કૃતિક જોડાણની ઉજવણી કરી હતી.

ન્યુઝીલેન્ડ PM: સારાનો ખરાબ પર વિજય
ન્યુઝીલેન્ડના વડાપ્રધાન ક્રિસ્ટોફર લક્સને દિવાળીના મૂળ સિદ્ધાંતો પર ભાર મૂક્યો. તેમણે કહ્યું, "દિવાળીનો તહેવાર અંધકાર પર પ્રકાશ, નિરાશા પર આશા અને ખરાબ પર સારાના વિજયનું પ્રતીક છે. પરિવારો અને મિત્રો આ પ્રસંગને આનંદ અને સંવાદિતા સાથે ઉજવે."

સિંગાપોર PM: હૃદયમાં રોશનીનો અર્થ
સિંગાપોરના વડાપ્રધાન લોરેન્સ વોંગે સોશિયલ મીડિયા પ્લેટફોર્મ 'X' પર સંદેશ શેર કરતાં કહ્યું, "અંધકાર પર પ્રકાશ, ભય પર આશા. દિવાળી દરમિયાન, આપણે ફક્ત આપણા ઘરોમાં રોશની જ ઉજવતા નથી, પરંતુ તેમના હૃદયમાં રહેલા અર્થને પણ યાદ કરીએ છીએ. દરેકને તેજસ્વી અને અર્થપૂર્ણ દિવાળીની શુભેચ્છાઓ."

સિંગાપોર સ્થિત ભારતીય સમુદાયના સભ્યોએ પણ આ તહેવારને નવી શરૂઆત, કુટુંબના પુનઃમિલન, મીઠાઈઓ અને સમૃદ્ધિના પર્વ તરીકે ગણાવીને પોતાની ખુશી વ્યક્ત કરી હતી.

દિવાળી: પાંચ દિવસીય પર્વ
ઉલ્લેખનીય છે કે, દિવાળી એ પાંચ દિવસનો તહેવાર છે, જેમાં ધનતેરસ, નરક ચતુર્દશી (છોટી દિવાળી), મુખ્ય દિવાળી, ગોવર્ધન પૂજા અને ભાઈબીજનો સમાવેશ થાય છે. આ સમય દરમિયાન, ભક્તો સુખ, સમૃદ્ધિ અને સુખાકારી માટે ભગવાન ગણેશ અને દેવી લક્ષ્મીની પ્રાર્થના કરે છે.