નવી દિલ્હી: દિવાળીના શુભ પર્વ પર, આજે સોમવાર સવારથી જ દુનિયાભરના ઇન્ટરનેટ યુઝર્સને એક મોટી સમસ્યાનો સામનો કરવો પડ્યો. સવારે ૯ વાગ્યાની આસપાસ એક સાથે એમેઝોન, ગૂગલ, સ્નેપચેટ, રોબ્લોક્સ, કેનવા, ફોર્ટનાઇટ સહિતની અનેક મોટી વેબસાઇટ્સ અને એપ્લિકેશન્સમાં વિશ્વવ્યાપી ઇન્ટરનેટ આઉટેજ જોવા મળ્યો હતો.

હજારો યુઝર્સે 'ડાઉન ડિટેક્ટર' પર ફરિયાદ નોંધાવી કે એપ્સ અચાનક બંધ થઈ ગઈ અને વેબસાઇટ્સ પર "સર્વર ડાઉન" ના મેસેજ આવવા લાગ્યા હતા.

AWS ગ્લિચ બન્યું 'ખલનાયક'
આ ગ્લોબલ આઉટેજનું મૂળ કારણ એમેઝોન વેબ સર્વિસીસ (AWS) માં આવેલી ટેકનિકલ સમસ્યા છે. AWS એ એક વિશાળ ક્લાઉડ પ્લેટફોર્મ છે જે વિશ્વભરની હજારો મોટી કંપનીઓને સર્વર્સ, ડેટાબેઝ અને સ્ટોરેજ જેવી મહત્ત્વપૂર્ણ સેવાઓ પૂરી પાડે છે. AWS માં સમસ્યા આવતાં જ યુરોપ, એશિયા અને યુનાઇટેડ સ્ટેટ્સ સહિત વિશ્વભરના લાખો યુઝર્સ પ્રભાવિત થયા હતા.

કઈ કઈ સેવાઓ પ્રભાવિત થઈ?
આ આઉટેજે ઘણી લોકપ્રિય ડિજિટલ સેવાઓને અસર કરી, જેમાં મુખ્યત્વે:

• સોશિયલ મીડિયા/મેસેજિંગ: સ્નેપચેટ, સ્લેક, સિગ્નલ, ટિન્ડર.

• ઈ-કોમર્સ અને સ્ટ્રીમિંગ: એમેઝોન ઈ-કોમર્સ, એમેઝોન મ્યુઝિક, પ્રાઇમ વિડીયો.

• ગેમિંગ પ્લેટફોર્મ: રોબ્લોક્સ, ક્લેશ રોયલ, ક્લેશ ઓફ ક્લાન્સ, ફોર્ટનાઇટ, પોકેમોન ગો.

• અન્ય: કેનવા, યુકેની HMRC ટેક્સ વેબસાઇટ, ફ્રાન્સની SFR અને ફ્રી ટેલિકોમ કંપનીઓ.
જ્યારે ક્રિપ્ટોકરન્સી પ્લેટફોર્મ Coinbase એ યુઝર્સને ખાતરી આપી કે ભંડોળ સંપૂર્ણપણે સુરક્ષિત છે.

સુધારણાનું કાર્ય ચાલુ, ધીમી ગતિ યથાવત
AWS એ નિવેદન બહાર પાડીને જણાવ્યું છે કે તેઓ ટેકનિકલ સમસ્યાને ઉકેલવા માટે યુદ્ધના ધોરણે કામ કરી રહ્યા છે અને સેવાઓ ધીમે ધીમે પુનઃસ્થાપિત કરવામાં આવી રહી છે. જોકે, મોટાભાગની વેબસાઇટ્સ અને એપ્લિકેશન્સ હાલમાં સંપૂર્ણ રીતે સામાન્ય રીતે કાર્ય કરી રહી નથી. કેટલાક સ્થળોએ હજી પણ ધીમી ગતિ અને લોગિન સમસ્યાઓ ચાલુ હોવાના અહેવાલો છે.

યુઝર્સે સોશિયલ મીડિયા પર આ તકલીફ વ્યક્ત કરવા માટે મીમ્સ અને ફની પોસ્ટ્સનો સહારો લીધો હતો.