ચેન્નાઈ, તા. 20 : બચાવ કામગીરી: તમિલનાડુના માછીમારો : કેન્દ્ર સરકારે તમિલનાડુના કન્યાકુમારી જિલ્લાના ૩૦ થી વધુ માછીમારો માટે તાત્કાલિક પગલાં લેતા સેટેલાઇટ ફોન સેવા પુનઃસ્થાપિત કરી છે, જેઓ ખરાબ હવામાનને કારણે દરિયામાં ફસાયેલા હતા. નાણામંત્રી નિર્મલા સીતારમણે સોમવારે આ મહત્ત્વપૂર્ણ જાહેરાત કરી હતી, જેનાથી ફસાયેલા માછીમારોના પરિવારોને મોટી રાહત મળી છે.

DoT અને BSNLની સફલતા
નિર્મલા સીતારમણે સોશિયલ મીડિયા પર માહિતી આપતા જણાવ્યું:
"BSNL અને દૂરસંચાર વિભાગ (DoT)ના હસ્તક્ષેપ બાદ ૩૦ થી વધુ માછીમારો માટે સેટેલાઇટ ફોન સેવા પુનઃસ્થાપિત કરવામાં આવી છે. ખાનગી ઓપરેટરે અસ્થાયી રૂપે કનેક્ટિવિટી પુનઃસ્થાપિત કરી છે, જેનાથી સમુદ્રમાં ફસાયેલા લોકો સાથે સંપર્ક શક્ય બન્યો."

નાણામંત્રીએ વધુમાં જણાવ્યું કે આ મદદને કારણે હવામાન ચેતવણી હવે મોટાભાગના માછીમારો સુધી પહોંચી ગઈ છે, અને તેઓ સુરક્ષિત રીતે કિનારે પાછા ફરવાની તૈયારી કરી રહ્યા છે. બાકીના માછીમારો માટે પણ સેવા પુનઃસ્થાપિત કરવા માટે BSNL અને DoT ખાનગી ઓપરેટરો સાથે સતત કામ કરી રહ્યા છે.

ચર્ચના ફાધરે વ્યક્ત કરી કૃતજ્ઞતા
નિર્મલા સીતારમણે આ માહિતી કન્યાકુમારીના વલ્લવિલાઈ ગામમાં આવેલ સેન્ટ મેરી ચર્ચના ફાધર થોમસ સાથે પણ શેર કરી હતી.

નાણામંત્રીએ કહ્યું, "મારી ઓફિસે ફાધર થોમસને જાણ કરી છે કે ફોન સેવા પુનઃસ્થાપિત કરવામાં આવી છે, જેના માટે તેમણે રાહત અને કૃતજ્ઞતા વ્યક્ત કરી છે." આ મુદ્દો સૌપ્રથમ ભાજપના માછીમાર સેલ દ્વારા ઉઠાવવામાં આવ્યો હતો.

હવામાનની ચેતવણી યથાવત
આ દરમિયાન, ભારતીય હવામાન વિભાગ (IMD) એ માછીમારોને હવામાનની ચેતવણીનું સખત પાલન કરવાની સલાહ આપી છે:

• માછીમારોને ૨૧ ઓક્ટોબર સુધી દક્ષિણપૂર્વ અને પૂર્વ-મધ્ય અરબી સમુદ્ર, લક્ષદ્વીપ ટાપુઓ, કોમોરિન વિસ્તાર, તેમજ કર્ણાટક, કેરળ અને દક્ષિણ તમિલનાડુ દરિયાકાંઠે દરિયામાં ન જવાની સલાહ છે.

• ૨૨ અને ૨૩ ઓક્ટોબરે પણ દક્ષિણપશ્ચિમ અને પૂર્વ-મધ્ય અરબી સમુદ્ર પર દરિયામાં ન જવાની સલાહ આપવામાં આવી છે.