વૈશાલી (બિહાર), તા. ૨૧ :  બિહાર વિધાનસભા ચૂંટણીમાં મહાગઠબંધન (RJD, કોંગ્રેસ વગેરે) માટે વૈશાલી જિલ્લાની લાલગંજ બેઠક પર સર્જાયેલો આંતરિક વિવાદ આખરે થાળે પડ્યો છે. આ બેઠક પર ગઠબંધનના બે પક્ષો (RJD અને કોંગ્રેસ)ના ઉમેદવારો સામસામે આવી જતાં ભારે મૂંઝવણ ઊભી થઈ હતી, પરંતુ હવે કોંગ્રેસે મોટું મન રાખીને ઉમેદવારી પાછી ખેંચી લેતા મામલો શાંત પડ્યો છે.

કોંગ્રેસના આદિત્ય રાજાએ 'ત્યાગ' કર્યો!
લાલગંજ બેઠક RJDના ફાળે ગઈ હોવા છતાં, કોંગ્રેસ પાર્ટીએ અહીં આદિત્ય કુમાર રાજાને ટિકિટ આપી હતી, જ્યારે RJDએ જાણીતા 'બાહુબલી' નેતા મુન્ના શુક્લાની પુત્રી શિવાની શુક્લાને મેદાનમાં ઉતાર્યા હતા. જોકે, મહાગઠબંધનની એકતા જાળવવા માટે કોંગ્રેસના ઉમેદવાર આદિત્ય રાજાએ આજે પોતાનું નામાંકન પાછું ખેંચી લીધું છે.

આદિત્ય રાજાએ ઉમેદવારી પાછી ખેંચતા સ્પષ્ટતા કરી કે, "મેં કોઈ દબાણ કે અંગત સ્વાર્થને કારણે નામાંકન પાછું ખેંચ્યું નથી, પરંતુ લોકશાહી સમાજમાં 'ગઠબંધન ધર્મ' નિભાવવા માટે આ નિર્ણય લીધો છે."

હવે શિવાની શુક્લા મહાગઠબંધનના એકમાત્ર ઉમેદવાર
આદિત્ય રાજાની પીછેહઠ બાદ, લાલગંજ બેઠક પર મહાગઠબંધન તરફથી હવે માત્ર એક જ ઉમેદવાર મેદાનમાં છે: શિવાની શુક્લા (RJD).

તેઓ મજબૂત રાજકીય પૃષ્ઠભૂમિ ધરાવે છે. તેમના પિતા મુન્ના શુક્લાએ વર્ષ ૨૦૦૦માં હાજીપુર જેલમાંથી અપક્ષ ઉમેદવાર તરીકે ચૂંટણી લડીને જીત મેળવી હતી અને બાદમાં જેડીયુની ટિકિટ પર પણ વિજયી રહ્યા હતા. શિવાની શુક્લાની માતા પણ આ મતવિસ્તારમાંથી ધારાસભ્ય રહી ચૂક્યા છે. શિવાની હાલમાં વિસ્તારમાં સક્રિય છે અને લોકો સાથે સતત સંપર્ક જાળવી રહી છે.

હવે આ બેઠક પર શિવાની શુક્લા (RJD) નો સીધો મુકાબલો ભાજપના ઉમેદવાર સંજય સિંહ સાથે થશે.

જિલ્લા ચૂંટણી અધિકારી વર્ષા સિંહે આદિત્ય રાજાના નામાંકન પાછા ખેંચવાની અને મહુઆ વિધાનસભા મતવિસ્તારમાંથી અન્ય બે ઉમેદવારોએ પણ ઉમેદવારી પાછી ખેંચી હોવાની પુષ્ટિ કરી છે. મહાગઠબંધને સમયસર વિવાદ ઉકેલી લેતાં હવે તેમની એકતા મજબૂત થઈ છે.