બેઇજિંગ, તા. ૨૧ :  ચીનમાં ખાદ્ય સુરક્ષા અને સ્વચ્છતા પર ગંભીર પ્રશ્નો ઊભા થયા છે. એક જ દિવસમાં દેશના વિવિધ ભાગોમાં લોકપ્રિય ખાદ્ય વસ્તુઓમાંથી 'માનવ દાંત' મળી આવવાની ચોંકાવનારી ઘટનાઓ સામે આવી છે, જેનાથી સમગ્ર દેશના લોકોમાં ગભરાટ ફેલાયો છે.

ત્રણ ઘટનાઓ, એક જ ડર: દાંત ક્યાંથી આવ્યા?

૧. જિલિન: સોસેજમાંથી દાંતની હરોળ!
જિલિન પ્રાંતમાં એક મહિલાએ બહારના સ્ટોલ પરથી પોતાના બાળક માટે સોસેજ ખરીદ્યો હતો. સોસેજની અંદર ત્રણ માનવ દાંતની હરોળ જોઇને તે સ્તબ્ધ થઈ ગઈ હતી. વિક્રેતાએ શરૂઆતમાં ઇનકાર કર્યો, પરંતુ સ્થાનિક બજાર દેખરેખ અધિકારીઓના હસ્તક્ષેપ પછી તેણે માફી માંગી હતી.

૨. ગુઆંગડોંગ: ડિમ સમમાંથી દાંત મળ્યા
આ જ દિવસે, ગુઆંગડોંગ પ્રાંતના ડોંગગુઆન શહેરમાં, એક મહિલાના પિતાને સંજીન સૂપ ડમ્પલિંગ રેસ્ટોરન્ટમાં પીરસવામાં આવેલા ડિમ સમમાંથી બે માનવ દાંત મળ્યા. મહિલાએ પુષ્ટિ આપી કે દાંત તેમના પિતાના નહોતા. રેસ્ટોરન્ટ ચેઇનનું કહેવું છે કે તેમના બધા ડમ્પલિંગ સીધા મુખ્ય મથકથી પૂરા પાડવામાં આવે છે, તેથી દાંત તેમાં કેવી રીતે આવ્યા તે તેમને ખ્યાલ નથી.

૩. શાંઘાઈ: હાઈ-ક્વોલિટી કેકમાંથી નકલી દાંત
મામલો માત્ર અહીં જ ન અટક્યો. બીજા જ દિવસે, શાંઘાઈમાં ઉચ્ચ ગુણવત્તાના ખાદ્ય ધોરણો માટે જાણીતા 'સેમ્સ ક્લબ' ની શાખામાંથી ખરીદેલી અખરોટની કેકમાં એક ગ્રાહકને નકલી માનવ દાંત મળ્યો. આ ઘટનાથી સ્ટોરના સ્ટાફને પણ આઘાત લાગ્યો હતો. સ્ટોરે ગ્રાહકને ૧,૦૦૦ યુઆન (લગભગ ₹૧૨,૦૦૦) નું વળતર આપ્યું.

ચીનમાં આ પ્રકારની ઘટનાઓથી ખાદ્ય ઉત્પાદન પ્રક્રિયાઓની સ્વચ્છતા અને દેખરેખ પર ગંભીર પ્રશ્નો ઉભા થયા છે. સ્થાનિક વહીવટીતંત્રે દરેક કેસમાં સઘન તપાસ શરૂ કરી છે.