પટણા. ૨૦૨૫ માં બિહાર વિધાનસભાની ચૂંટણી પહેલા રાજકીય ગરમી ખૂબ જ વધી ગઈ છે. નેતાઓ સતત પોતાના સ્થાન બદલી રહ્યા છે. વધુ એક અગ્રણી નેતા ભાજપમાં જોડાયા છે. આરજેડીના ભૂતપૂર્વ ધારાસભ્ય અનિલ સહાની ભાજપમાં જોડાયા છે.

બુધવારે, તેઓ કેન્દ્રીય મંત્રી ધર્મેન્દ્ર પ્રધાન અને પાર્ટીના રાષ્ટ્રીય મહાસચિવ વિનોદ તાવડેની હાજરીમાં ભાજપમાં જોડાયા હતા.

એ નોંધવું જોઇએ કે ત્રણ વર્ષ પહેલાં સીબીઆઈ કોર્ટે છેતરપિંડીના કેસમાં દોષિત ઠેરવ્યા બાદ આરજેડીના ભૂતપૂર્વ નેતા અનિલ સહાનીને બિહાર વિધાનસભામાંથી ગેરલાયક ઠેરવવામાં આવ્યા હતા.

દિલ્હીની સીબીઆઈ કોર્ટે ૨૦૧૨ માં તેમને નકલી એર ટિકિટ સબમિટ કરવા બદલ દોષિત ઠેરવ્યા હતા. તે સમયે, અનિલ સહાની રાજ્યસભાના સાંસદ હતા

સહાનીને પાર્ટીમાં સામેલ કરીને, ભાજપે નિષાદ સમુદાયને આકર્ષવાનો પ્રયાસ કર્યો છે. નિષાદ સમુદાય અત્યંત પછાત વર્ગ છે અને તેમના ગૃહ જિલ્લા મુઝફ્ફરપુરમાં નોંધપાત્ર વસ્તી છે.

સહાનીએ 2020 ની વિધાનસભા ચૂંટણીમાં કુર્હાનીથી ભાજપના કેદાર ગુપ્તાને 900 થી ઓછા મતોના માર્જિનથી હરાવ્યા હતા. ગુપ્તાએ બાદમાં સાહનીની ગેરલાયકાત પછી યોજાયેલી પેટાચૂંટણી જીતી અને મંત્રી બન્યા.