નવી દિલ્હી, તા. ૨૩ ઓક્ટોબર: બિઝનેસ સોફ્ટવેર ક્ષેત્રની જાણીતી કંપની જોહો (Zoho) હવે ટૂંક સમયમાં જ ડિજિટલ પેમેન્ટ સ્પેસમાં પ્રવેશ કરવા જઈ રહી છે. કંપની હાલમાં 'Zoho Pay' નામની એક નવી પેમેન્ટ એપ લોન્ચ કરવાની તૈયારી કરી રહી છે. આ એપ માત્ર એક સ્વતંત્ર (standalone) એપ તરીકે જ ઉપલબ્ધ નહીં હોય, પરંતુ તે જોહોની મેસેજિંગ એપ 'અરટ્ટાઈ' (Arattai) માં પણ સંકલિત (Embed) કરવામાં આવશે. આ પગલા સાથે જોહો હવે Google Pay અને PhonePe જેવી દિગ્ગજ કંપનીઓને સીધી ટક્કર આપવા તરફ આગળ વધી રહી છે.
સરળ અને સુરક્ષિત ટ્રાન્ઝેક્શનનો અનુભવ
જોહો પેમેન્ટ્સ ટેકના સીઈઓ શિવરામકૃષ્ણન ઈશ્વરને જણાવ્યું હતું કે 'Zoho Pay' નો હેતુ ગ્રાહકોને સુરક્ષિત રીતે પૈસા મોકલવા અને મેળવવા તેમજ કોઈપણ અવરોધ વિના ટ્રાન્ઝેક્શન કરવાની સુવિધા પૂરી પાડવાનો છે.
તેમણે કહ્યું, "આ એપ એક સ્મૂધ, સુરક્ષિત અને સંકલિત પેમેન્ટ અનુભવ પ્રદાન કરશે, જે અરટ્ટાઈમાં પણ ઉપલબ્ધ હશે. તેનાથી વપરાશકર્તાઓ તેમની ચેટ વિન્ડોમાંથી બહાર નીકળ્યા વિના જ ટ્રાન્ઝેક્શન કરી શકશે." આનાથી યુઝર એક્સપિરિયન્સ બહેતર બનશે.
જોહોની મોટી ફિનટેક યોજનાઓ
જોહો હાલમાં બિઝનેસ પેમેન્ટ્સ અને પોઈન્ટ-ઓફ-સેલ (POS) સોલ્યુશન્સ પ્રદાન કરે છે, પરંતુ કંપની હવે આ ક્ષેત્રમાં વધુ ઊંડાણપૂર્વક ઉતરવાની યોજના બનાવી રહી છે. ઈશ્વરને જણાવ્યું કે, "અમારો ફિનટેક અભિગમ ક્રમશઃ વધવાનો છે. અમે પેમેન્ટ્સથી શરૂઆત કરી રહ્યા છીએ અને ધીમે ધીમે તેને લેન્ડિંગ (ધિરાણ), બ્રોકિંગ, ઈન્સ્યોરન્સ અને વેલ્થટેક જેવા સેગમેન્ટ્સ સુધી લઈ જવાની યોજના બનાવી રહ્યા છીએ."
Zoho Pay ઉપરાંત, કંપની Zoho Billing નામનું એક નવું ઇન્વોઇસિંગ અને સબ્સ્ક્રિપ્શન મેનેજમેન્ટ સોલ્યુશન પણ લાવી રહી છે. આ સાથે, Zoho Payroll ને બેંકો સાથે ડીપ ઇન્ટિગ્રેશન કરવામાં આવી રહ્યું છે. આ સમગ્ર નાણાકીય માળખું (Financial Stack) પેમેન્ટ કલેક્શનથી લઈને કેશ ફ્લો મેનેજમેન્ટ અને ઓટોમેટેડ પેરોલ સુધીની સેવાઓ પૂરી પાડશે.
ઝડપી રોલઆઉટની તૈયારી
Zoho Pay હાલમાં આંતરિક પરીક્ષણ (Internal Testing) તબક્કામાં છે. તેને આગામી કેટલાક મહિનાઓમાં તબક્કાવાર રીતે લોન્ચ કરવામાં આવશે. કંપની તેને પહેલા અરટ્ટાઈ દ્વારા અને પછી એક સ્વતંત્ર એપ્લિકેશન તરીકે રજૂ કરશે. ઈશ્વરને સ્પષ્ટ કર્યું કે, "અમારો લક્ષ્યાંક એક એવું પરસ્પર જોડાયેલું નાણાકીય સિસ્ટમ બનાવવાનો છે જે ગ્રાહકો અને નાના વ્યવસાયો, બંનેની જરૂરિયાતોને પૂરી કરી શકે."
જોહોનો આ નવો પ્રયાસ ડિજિટલ પેમેન્ટ માર્કેટમાં સ્પર્ધા વધારશે અને યુઝર્સને એક સંકલિત અને સુરક્ષિત પેમેન્ટ પ્લેટફોર્મ પ્રદાન કરશે.