નવી દિલ્હી, તા. ૨૩ ઓક્ટોબર: અસમમાં એક મોટી રેલ દુર્ઘટના થતા થતા ટળી ગઈ છે. નોર્થઈસ્ટ ફ્રન્ટિયર રેલવેના અલીપુરદ્વાર ડિવિઝનમાં આવેલા સાલાકાટી અને કોકરાઝાર સ્ટેશનની વચ્ચે રેલવે ટ્રેક પર ગુરુવારે મોડી રાત્રે એક સંદિગ્ધ વિસ્ફોટ થયો હોવાના સમાચાર સામે આવ્યા છે. આ જોરદાર ધમાકાને કારણે રેલવે ટ્રેક અને સ્લીપર્સને નુકસાન પહોંચ્યું હતું, જેના કારણે આશરે ૮ થી ૧૦ ટ્રેનો મોડી પડી હતી અને મુસાફરોને ભારે મુશ્કેલીનો સામનો કરવો પડ્યો હતો.
નોર્થઈસ્ટ ફ્રન્ટિયર રેલવે (NFR) ના સીપીઆરઓ દ્વારા જાહેર કરાયેલા નિવેદન મુજબ, ૨૩.૧૦.૨૦૨૫ ના રોજ વહેલી સવારે લગભગ ૧:૦૦ કલાકે જ્યારે UP AZARA સુગર માલગાડી આ સેક્શનમાંથી પસાર થઈ રહી હતી, ત્યારે ટ્રેન મેનેજરે જોરદાર આંચકો (ઝટકો) લાગવાની જાણ કરી હતી, જેના પગલે ટ્રેનને તાત્કાલિક રોકવામાં આવી હતી.
વિસ્ફોટની શંકા અને તપાસના આદેશ
તપાસ દરમિયાન ટ્રેક અને સ્લીપર્સને થયેલા નુકસાનની ખબર પડી, જેના કારણે વિસ્ફોટની શંકા વધુ ઘેરી બની હતી. કોકરાઝારના રેલવે પોલીસ સુપરિટેન્ડેન્ટ પ્રાણજીત બોરાએ જણાવ્યું હતું કે, "રેલવે ટ્રેક પર નુકસાન જોવા મળ્યું છે, જે સંભવતઃ બ્લાસ્ટને કારણે થયું છે. આ મામલે તપાસ ચાલુ છે અને પ્રાથમિક તબક્કે હાલમાં કંઈપણ ચોક્કસ કહી શકાય તેમ નથી. જો આ તોડફોડની ઘટના હશે, તો તેમાં કોણ સામેલ છે તે શોધી કાઢવું પડશે."
રેલવે લોકો પાયલટે રાત્રે જ ગરબડની જાણ કરી હતી, જેના પગલે જિલ્લા પોલીસ, GRP અને ઇન્ટેલિજન્સ અધિકારીઓ ઘટનાસ્થળે પહોંચ્યા હતા અને તપાસ હાથ ધરી હતી.
ઓપરેશનલ કામગીરી પુનઃસ્થાપિત
રેલવે અધિકારીઓએ જણાવ્યું કે ટ્રેકને સવારે ૫:૨૫ કલાકે ઠીક કરી દેવામાં આવ્યો હતો, અને સવારે ૫:૩૦ કલાકે સામાન્ય ટ્રેન સેવાઓ ફરીથી શરૂ કરી દેવામાં આવી હતી. આ ઘટનાને પગલે રેલવે વિભાગ દ્વારા સમગ્ર સેક્શનમાં પેટ્રોલિંગ વધારી દેવામાં આવ્યું છે. હાલમાં રાજ્ય પોલીસ, RPF અને ઇન્ટેલિજન્સ અધિકારીઓ દ્વારા આ કેસની સઘન તપાસ કરવામાં આવી રહી છે.