નવી દિલ્હી: રશિયા અને યુક્રેન વચ્ચેનો સંઘર્ષ શાંત થવાને બદલે હવે વધુ ઉગ્ર બની રહ્યો છે. યુક્રેને દક્ષિણ રશિયામાં આવેલા એક મુખ્ય ગેસ પ્રોસેસિંગ પ્લાન્ટને લક્ષ્ય બનાવીને ડ્રોન હુમલો કર્યો હોવાનું રશિયન અધિકારીઓએ રવિવારે જણાવ્યું હતું.
ઓરેનબર્ગમાં સ્થિત આ પ્લાન્ટ વિશ્વના સૌથી મોટા ગેસ ઉત્પાદન અને પ્રોસેસિંગ પ્લાન્ટ્સમાંનો એક છે, જેની વાર્ષિક ક્ષમતા 45 અબજ ક્યુબિક મીટર જેટલી છે. રશિયાની સરકારી કંપની 'ગેઝપ્રોમ' દ્વારા સંચાલિત આ પ્લાન્ટ કઝાકિસ્તાનના કરાચગનાક ક્ષેત્રમાંથી આવતા ગેસ કન્ડેન્સેટને પ્રોસેસ કરે છે.
પ્રાદેશિક ગવર્નર યેવગેની સોલંતસેવના જણાવ્યા અનુસાર, ડ્રોન હુમલાઓને કારણે પ્લાન્ટની એક કાર્યશાળામાં આગ લાગી હતી અને પ્લાન્ટનો અમુક હિસ્સો ક્ષતિગ્રસ્ત થયો હતો. કઝાક ઊર્જા મંત્રાલયે પણ પુષ્ટિ કરી છે કે હુમલાને કારણે પ્લાન્ટ અસ્થાયીરૂપે કઝાકિસ્તાનથી આવતા ગેસને પ્રોસેસ કરવામાં અસમર્થ છે.
યુક્રેન છેલ્લા કેટલાક મહિનાઓથી રશિયન ઊર્જા સુવિધાઓ પર હુમલા તેજ કરી રહ્યું છે, કારણ કે તે આ સુવિધાઓને મોસ્કોના યુદ્ધ પ્રયાસોને નાણાં પૂરા પાડવાના મુખ્ય સ્ત્રોત માને છે.
યુક્રેનની જનરલ સ્ટાફે માત્ર ઓરેનબર્ગ પ્લાન્ટમાં આગ લાગવાનો જ નહીં, પરંતુ રશિયાના સમારા ક્ષેત્રમાં સ્થિત નોવોકુઇબિશેવસ્ક તેલ રિફાઇનરી પર પણ ડ્રોન હુમલો કરવાનો દાવો કર્યો છે. બીજી તરફ, રશિયાના સંરક્ષણ મંત્રાલયે રાત દરમિયાન યુક્રેનના 45 ડ્રોન તોડી પાડ્યા હોવાનો દાવો કર્યો છે.
આ હુમલો સ્પષ્ટપણે દર્શાવે છે કે યુક્રેન રશિયાની ઊર્જા સપ્લાય લાઇનને નિશાન બનાવીને યુદ્ધનો મોરચો મધ્ય રશિયા તરફ લઈ જવાનો પ્રયાસ કરી રહ્યું છે, જેનાથી રશિયાને આર્થિક અને લશ્કરી રીતે ફટકો પડે.