મુંબઈ: ભારતીય જાહેરાત જગતને એક નવી ઓળખ આપનાર, 'એડ-ગુરુ' તરીકે પ્રખ્યાત અને પદ્મશ્રી સન્માનિત પીયૂષ પાંડેનું આજે સવારે ૭૦ વર્ષની વયે અવસાન થયું છે. તેઓ છેલ્લા કેટલાક સમયથી ગંભીર ઇન્ફેક્શન સામે ઝઝૂમી રહ્યા હતા. તેમના નિધનથી ભારતના ક્રિએટિવ અને એડવર્ટાઇઝિંગ ઉદ્યોગમાં શોકનો માહોલ છે. 

પીયૂષ પાંડેના અંતિમ સંસ્કાર આવતીકાલે, ૨૫ ઓક્ટોબરના રોજ મુંબઈના શિવાજી પાર્ક સ્મશાનગૃહ ખાતે કરવામાં આવશે.

પીયૂષ પાંડે એ શખ્સિયત હતા જેમણે જાહેરાતોને માત્ર ઉત્પાદન વેચવાનું માધ્યમ ન રાખતાં તેને ભારતીય સંસ્કૃતિ, ભાવનાઓ અને રોજિંદા જીવન સાથે જોડી દીધી હતી. 

તેઓએ જ વર્ષ ૨૦૧૪ની લોકસભા ચૂંટણી માટે ભારતીય જનતા પાર્ટીનું અત્યંત લોકપ્રિય સૂત્ર 'અબકી બાર મોદી સરકાર' ઘડ્યું હતું, જેણે ચૂંટણી પ્રચારની દિશા બદલી નાખી હતી.

આઇકોનિક જાહેરાતોના શિલ્પકાર

પીયૂષ પાંડેની કલમે એવી જાહેરાતો રચી જે આજે પણ લોકોના મનમાં જીવંત છે. તેમની કેટલીક યાદગાર ઝુંબેશોમાં આનો સમાવેશ થાય છે:

* ફેવિકોલ: "ફેવિકોલ કા મજબૂત જોડ હૈ, ટૂટેગા નહીં" થી લઈને માછીમાર, ઈંડું અને બસવાળી યાદગાર જાહેરાતો.

 * કેડબરી: "કુછ ખાસ હૈ" અને ક્રિકેટ ગ્રાઉન્ડ પર ડાન્સ કરતી યુવતીની પ્રખ્યાત જાહેરાત.

 * હમારા બજાજ: જેણે આખા દેશને એકસૂત્રમાં બાંધ્યો.

 * ઠંડા મતલબ કોકા કોલા: આમિર ખાન સાથેની આ ઝુંબેશ ખૂબ જ લોકપ્રિય બની હતી.

 * એશિયન પેઇન્ટ્સ: "હર ઘર કુછ કેહતા હૈ".

 * પોલિયો અભિયાન: અમિતાભ બચ્ચન સાથેનું "દો બૂંદ ઝિંદગી કી".

ઓગિલ્વી એન્ડ માધરથી વૈશ્વિક ઓળખ

૫ સપ્ટેમ્બર ૧૯૫૫ના રોજ જન્મેલા પીયૂષ પાંડેએ ૧૯૮૨માં ઓગિલ્વી એન્ડ માધર (હવે ઓગિલ્વી)માં એકાઉન્ટ એક્ઝિક્યુટિવ તરીકે કારકિર્દી શરૂ કરી હતી અને પોતાની પ્રતિભાના જોરે તેઓ એજન્સીના ગ્લોબલ ચીફ ક્રિએટિવ ઓફિસર અને એક્ઝિક્યુટિવ ચેરમેન બન્યા. 

જાહેરાત જગતમાં તેમના યોગદાન બદલ ભારત સરકારે તેમને ૨૦૧૬માં 'પદ્મશ્રી' પુરસ્કારથી સન્માનિત કર્યા હતા. તેઓ કાન્સ લાયન્સ ખાતે 'લાયન ઓફ સેન્ટ માર્ક' એવોર્ડ મેળવનાર પ્રથમ એશિયન પણ હતા.

તેમના નિધન પર ઉદ્યોગ જગતના અગ્રણીઓ, રાજકીય નેતાઓ અને સર્જનાત્મક ક્ષેત્રની હસ્તીઓએ ઊંડો શોક વ્યક્ત કર્યો છે અને તેમને 'ભારતીય જાહેરાતોનો અવાજ' ગણાવી શ્રદ્ધાંજલિ અર્પી છે.