નવી દિલ્હી/ઇસ્લામાબાદ: પાકિસ્તાન અને અફઘાનિસ્તાનના તાલિબાન વચ્ચે ચાલી રહેલા ગંભીર સંઘર્ષની સૌથી મોટી કિંમત પાકિસ્તાનની જનતા ચૂકવી રહી છે. ૧૧ ઓક્ટોબરથી બંને દેશોની ૨૬૦૦ કિલોમીટર લાંબી સરહદ સંપૂર્ણપણે બંધ થઈ જતાં, ખાદ્ય ચીજોની તીવ્ર અછત સર્જાઈ છે, જેના કારણે દૈનિક વપરાશની વસ્તુઓના ભાવ આસમાને પહોંચી ગયા છે.
સરહદ બંધ થવાને કારણે પાકિસ્તાનમાં રસોઈની સૌથી આવશ્યક ચીજોના ભાવમાં મોટો ઉછાળો આવ્યો છે.
સરહદ બંધ હોવાને કારણે સફરજન અને દ્રાક્ષ જેવા ફળોના ભાવમાં પણ તીવ્ર વધારો નોંધાયો છે. ઘણા નાના વિક્રેતાઓએ ઊંચા ભાવને કારણે ટામેટાં વેચવાનું બંધ કરી દીધું છે.
પાકિસ્તાન અને અફઘાનિસ્તાન વચ્ચે વાર્ષિક આશરે ૨.૩ બિલિયન ડૉલરનો વેપાર થાય છે, જેમાં શાકભાજી, ફળો અને અનાજનો મોટો હિસ્સો છે. પાક-અફઘાન ચેમ્બર ઑફ કોમર્સના વડા ખાન જાન અલોકઝાઈએ જણાવ્યું કે, "દરરોજ બંને પક્ષોને આશરે $૧ મિલિયનનું નુકસાન થઈ રહ્યું છે."
હાલમાં સરહદ પર લગભગ ૫,૦૦૦ કન્ટેનર અટવાયેલા છે, જેમાં મોટાભાગના શાકભાજી અને ફળો સડી ગયા છે. પુરવઠો પુનઃસ્થાપિત ન થાય ત્યાં સુધી આ ભાવમાં ઘટાડાની કોઈ સંભાવના નથી, જેના કારણે સામાન્ય પાકિસ્તાની નાગરિકોની મુશ્કેલીઓ ચરમસીમાએ પહોંચી છે. સરહદી સંઘર્ષ હવે પાકિસ્તાની સરકાર માટે આર્થિક અને રાજકીય મુશ્કેલી સર્જી રહ્યો છે.