ગોરખપુર/બસ્તી: બિહારના સીતામઢી જિલ્લાનો એક યુવાન છઠ્ઠ પૂજાના તહેવાર માટે દિલ્હીથી પોતાના વતન જઈ રહ્યો હતો, પરંતુ ચાલતી ટ્રેનમાં બે મુસાફરો દ્વારા કરાયેલા એક ઘાતક સ્ટંટને કારણે તેનું દર્દનાક મૃત્યુ થયું છે.
આ ઘટના આનંદ વિહાર-દરભંગા (૧૫૫૫૮) અમૃત ભારત એક્સપ્રેસ માં બની હતી. મૃતક યુવાનની ઓળખ બિહારના સીતામઢી જિલ્લાના બાથોલ ગામના રહેવાસી ઋતુરાજ ઠાકુર તરીકે થઈ છે.
મૃતક ઋતુરાજના પિતા બબ્બનજી ઠાકુરની ફરિયાદ મુજબ  ટ્રેનના કોચ S-9 માં મુસાફરી કરી રહેલા બે આરોપીઓ, અમૃત યાદવ ઉર્ફે માજી કુમાર અને ઋતુ રાજ રાય (બંને સીતામઢીના રહેવાસી), તેમની પાસે કામચલાઉ "ફટાકડા ફોડવાની બંદૂક" અને ફટાકડા હતા.
 મુસાફરી દરમિયાન, બંને આરોપીઓએ ટ્રેનની અંદર જ ફટાકડા ફોડ્યા. ફટાકડા ફૂટવાના કારણે દરવાજા પાસે બેઠેલો ઋતુરાજ ગભરાટમાં ટ્રેનમાંથી નીચે પટકાયો, જેના કારણે તેનું ઘટનાસ્થળે જ મોત થયું.
 બુધવારે સવારે તેનો મૃતદેહ ગૌર રેલ્વે સ્ટેશન નજીક પાટા પરથી મળી આવ્યો હતો.
આ ઘટના બાદ ટ્રેનમાં ગભરાટ ફેલાયો હતો અને ઓવરબ્રિજ પાસે ચેઇન પુલિંગ દ્વારા ટ્રેનને રોકવામાં આવી હતી. GRP પોલીસની તપાસમાં પુષ્ટિ મળી છે કે ટ્રેનની અંદર જ ફટાકડા ફૂટ્યા હતા.
 પોલીસે ઘટનાસ્થળેથી ફટાકડાની બંદૂક કબજે કરી છે.  વિસ્ફોટ દરમિયાન એક આરોપીના હાથ અને કપડાં પણ બળી ગયા હોવાનું જાણવા મળ્યું છે.  સૌથી મહત્ત્વપૂર્ણ પુરાવા તરીકે, પોલીસે બંને આરોપીઓના મોબાઇલ ફોનમાંથી ચાલતી ટ્રેનમાં ફટાકડા ફોડવાનો વીડિયો પણ જપ્ત કર્યો છે.
ઋતુરાજના પિતાની ફરિયાદના આધારે, GRP બસ્તીએ બંને આરોપીઓ સામે સદોષ હત્યા (ગેરકાનૂની હત્યા) નો કેસ નોંધ્યો છે. જીઆરપી ઇન્સ્પેક્ટર પંકજ કુમારે જણાવ્યું હતું કે પોસ્ટમોર્ટમ રિપોર્ટ અને ટેકનિકલ તપાસ બાદ આગળની કાર્યવાહી કરવામાં આવશે.