ન્યૂયોર્ક : આ સત્ય છે કે આપણેમાંથી મોટાભાગના લોકો ટૉઇલેટ બાઉલની અંદર શું છે તે જોવાનું ટાળીએ છીએ, પરંતુ હવે આ ટેવ બદલાવાની છે! બાથરૂમ પ્રોડક્ટ્સ બનાવતી જાણીતી બ્રાન્ડ Kohler એ એક ક્રાંતિકારી અને થોડું રમુજી લાગતું ડિવાઇસ લોન્ચ કર્યું છે: સ્માર્ટ ટૉઇલેટ કેમેરા (Smart Toilet Camera), જેનું નામ છે 'ડેકોડા' (Dekoda).
આ નાનકડું, વળાંકવાળું પોડ આકારનું ડિવાઇસ ટૉઇલેટની કિનારી પર ચોંટી જાય છે અને તમે જે ફ્લશ કરો છો તેનું સેન્સર અને આર્ટિફિશિયલ ઇન્ટેલિજન્સ (AI) દ્વારા વિશ્લેષણ કરીને તમારા સ્વાસ્થ્યની માહિતી (Health Insights) આપે છે. Kohler Health ની આ પહેલ બાથરૂમને "કનેક્ટેડ વેલનેસ હબ" માં બદલવાની છે, જ્યાં તમારું ટૉઇલેટ સ્માર્ટવોચની જેમ તમારું સ્વાસ્થ્ય ટ્રેક કરશે.
કેમેરો કેવી રીતે કામ કરે છે?
'ડેકોડા' માં બિલ્ટ-ઇન સેન્સર અને લાઇટ-આધારિત એલ્ગોરિધમ્સ છે, જે ફ્લશ થતા કચરાને સ્કેન કરીને હાઇડ્રેશન અને ગટ (આંતરડા) હેલ્થ સંબંધિત સંકેતો શોધે છે. Kohler નો દાવો છે કે આ કેમેરા લોહીના નિશાન જેવા ગંભીર લક્ષણોને પણ વહેલી તકે પકડી શકે છે, જેથી ગંભીર બીમારીઓ પહેલા જ યુઝર્સ ડૉક્ટરની સલાહ લઈ શકે.
આ સિસ્ટમમાં ત્રણ ભાગ છે: સ્માર્ટ સેન્સર, મેગ્નેટિક ચાર્જિંગ ડોક અને ફિંગરપ્રિન્ટ સ્કેનરવાળું વોલ-માઉન્ટેડ રિમોટ. આ રિમોટ જુદા-જુદા યુઝર્સને ઓળખવા માટે વપરાય છે. એકવાર ડેટા એકત્રિત થયા પછી, તે Kohler Health એપ સાથે સિંક થાય છે, જે પરિણામોનું વિશ્લેષણ કરે છે.
સુરક્ષા અને ગોપનીયતાની ચિંતાઓ
શૌચાલય પર નજર રાખતા કેમેરાને લઈને પ્રાઈવસી (ગોપનીયતા) સૌથી મોટી ચિંતા છે. જોકે, Kohler આશ્વાસન આપે છે કે ડેકોડાના સેન્સર માત્ર "તમારા ટૉઇલેટની અંદર જ જુએ છે અને ક્યાંય નહીં". ઉપકરણ એડજસ્ટેબલ ક્લેમ્પનો ઉપયોગ કરીને મોટાભાગના ટૉઇલેટ બાઉલ સાથે જોડાય છે.
Kohler Health ના CEO કાશ કાપડિયાએ જણાવ્યું કે જ્યારે યુઝર ફિંગરપ્રિન્ટ દ્વારા "સેશન સ્ટાર્ટ" કરે છે અને મૂત્ર પાણીના સ્તરને સ્પર્શે છે, ત્યારે જ કેમેરા તેનું LED લાઇટ ફ્લેશ કરવાનું શરૂ કરે છે. પછી તસવીરો એન્ડ-ટુ-એન્ડ એન્ક્રિપ્ટેડ સ્વરૂપે Kohler ના ક્લાઉડ પર અપલોડ થાય છે અને ૩ થી ૫ મિનિટમાં પરિણામો એપ પર દેખાય છે.
ડિવાઇસ રેન્ડમ ઇમેજ લેવાને બદલે, સમય જતાં તમારા બાથરૂમ પેટર્ન, જેમ કે આવર્તન (Frequency), સુસંગતતા (Consistency) અને આકારને ટ્રેક કરે છે. જો સિસ્ટમ લોહીના નિશાન જેવું કંઈક ચિંતાજનક શોધે છે, તો તે તરત જ યુઝરને ખાનગી ચેતવણી મોકલીને ડૉક્ટરનો સંપર્ક કરવા માટે પ્રેરિત કરે છે.
કિંમત, સબસ્ક્રિપ્શન અને વિવાદ
'ડેકોડા' ની કિંમત આશરે ₹૫૫,૭૨૨ (USD ૫૯૯) છે. જોકે, તેનો ઉપયોગ કરવા માટે સબસ્ક્રિપ્શન પણ જરૂરી છે, જે વ્યક્તિગત યુઝર માટે લગભગ ₹૫૮૦ પ્રતિ માસ અને પાંચ સભ્યો સુધીના પરિવાર માટે લગભગ ₹૧,૧૦૦ પ્રતિ માસ થી શરૂ થાય છે. હાલમાં આ ટ્રેકર ભારતમાં ઉપલબ્ધ નથી, અને એપ પણ માત્ર iOS યુઝર્સ માટે છે.
ડૉક્ટરો લાંબા સમયથી 'બ્રિસ્ટોલ સ્ટૂલ સ્કેલ' નો ઉપયોગ ગટ હેલ્થનું નિદાન કરવા માટે કરે છે. કાશ કાપડિયાએ કહ્યું કે, "લોકો કચરાને ફ્લશ કરી નાખવાનું વિચારે છે, પણ તેમાં આપણા વિશે ઘણી માહિતી હોય છે. હવે આપણે તેને હાથ લગાવ્યા વિના અભ્યાસ કરી શકીએ છીએ."
જોકે, ડાયેટિશિયન એશ્લે ઓસ્વાલ્ડ જેવા નિષ્ણાતો માને છે કે માત્ર બે દિવસના નવા આહારથી ગટ બેક્ટેરિયા બદલાઈ શકે છે, તેથી આ ટ્રેન્ડને અનુસરવો કેટલો ઉપયોગી છે તે એક પ્રશ્ન છે. તેમણે કહ્યું કે, "જ્યારે આપણે ફાઇબર પૂરતું નથી લેતા કે સક્રિય નથી રહેતા, ત્યારે આપણે મૂળભૂત બાબતો ભૂલીને ટ્રેન્ડ્સની પાછળ દોડીએ છીએ."
નોંધનીય છે કે આ ડિવાઇસ રિચાર્જેબલ બેટરી સાથે આવે છે અને કંપનીએ ચેતવણી આપી છે કે તે ઘેરા રંગના ટૉઇલેટ પર એટલી કાર્યક્ષમતાથી કામ કરતું નથી. ભવિષ્યના મોડેલોમાં ગંધ સેન્સર (smell sensors) અથવા ક્લિનિંગ એલર્ટ્સ પણ આવવાની સંભાવના છે.