નવી દિલ્હી, તા. 25 ઓક્ટોબર : વર્ષ ૨૦૨૫ના નોબેલ શાંતિ પુરસ્કાર વિજેતા મારિયા કોરીના માછાદોએ, જે છેલ્લા બે દાયકાથી વેનેઝુએલામાં લોકશાહીની પુનઃસ્થાપના માટે અભિયાન ચલાવી રહ્યા છે, તેમણે ભારતને "મહાન લોકશાહી" અને અન્ય દેશો માટે "ઉદાહરણ" તરીકે બિરદાવ્યું છે.
છેલ્લા ૧૫ મહિનાથી અજ્ઞાત સ્થળે છુપાયેલા માછાદોએ 'ટાઇમ્સ નાઉ'ને આપેલા ઇન્ટરવ્યૂમાં જણાવ્યું હતું કે, એકવાર વેનેઝુએલામાં લોકશાહી તરફ શાંતિપૂર્ણ સંક્રમણ હાંસલ થઈ જાય, પછી ભારત એક "મહાન સાથી" બની શકે છે, જેની સાથે વેનેઝુએલા અનેક મોરચે સંબંધો મજબૂત કરી શકે છે. માછાદોએ આશા વ્યક્ત કરી હતી કે તે વડાપ્રધાન મોદી સાથે વાતચીત કરી શકશે અને "ખૂબ જ જલ્દી એક મુક્ત વેનેઝુએલામાં તેમનું સ્વાગત" કરી શકશે.
ગાંધીજીના અહિંસક સંઘર્ષથી પ્રેરણા
ભારતના વૈશ્વિક સ્થાન વિશે વાત કરતાં માછાદોએ કહ્યું, "ભારત ઘણા દેશો માટે, ઘણી પેઢીઓ માટે, આ ક્ષેત્રમાં અને વિશ્વની સૌથી મોટી લોકશાહી હોવાના કારણે એક ઉદાહરણ રહ્યું છે. આ ખૂબ જ મોટું છે. તમારે તેની સારી સંભાળ લેવાની પણ જવાબદારી છે, કારણ કે વિશ્વભરના ઘણા લોકો તમારી તરફ જુએ છે."
તેમણે કહ્યું, "હું પૂરા દિલથી ભારતની પ્રશંસા કરું છું." માછાદોએ ઉમેર્યું કે તે મહાત્મા ગાંધીના સ્વતંત્રતા માટેના અહિંસક સંઘર્ષથી પ્રેરિત છે. તેમણે કહ્યું, "શાંતિપૂર્ણ રહેવું એ નબળાઈ નથી, અને ગાંધીજીએ સમગ્ર માનવતાને તેનો અર્થ બતાવ્યો."
માછાદોએ ભારતને સીધી અપીલ કરતાં કહ્યું, "એક મહાન લોકશાહી તરીકે વેનેઝુએલાના લોકોના અધિકારો અને લોકપ્રિય સાર્વભૌમત્વ માટે બોલવા માટે અમને ભારતના અવાજની જરૂર છે."
વેનેઝુએલાના ભવિષ્યમાં ભારતીય રોકાણની તકો
માછાદોએ વેનેઝુએલાના ભાવિ આર્થિક સંબંધોની સંભાવનાઓ વિશે પણ વાત કરી. તેમણે કલ્પના વ્યક્ત કરી કે એકવાર વેનેઝુએલા આગળ વધે અને 'બધા ગુનાહિત સમાજવાદી માળખાઓ'ને દૂર કરે, ત્યારે ભારતીય કંપનીઓ માટે માત્ર ઊર્જા જ નહીં, પણ માળખાગત સુવિધાઓ (Infrastructure) અને ટેલિકોમ ક્ષેત્રે પણ રોકાણની મોટી તકો ઊભી થશે.
ચૂંટણીમાં વિજય ચોરી લેવાનો આરોપ
માછાદોએ ૨૦૨૪ની રાષ્ટ્રપતિ ચૂંટણી વિશે વિસ્તારપૂર્વક વાત કરી. તેમણે આરોપ લગાવ્યો કે વિપક્ષની જબરજસ્ત જીત હોવા છતાં, નિકોલસ માદુરોના નેતૃત્વ હેઠળની વેનેઝુએલાની સરકારે આ જનાદેશ ચોરી લીધો.
તેમણે યાદ કર્યું, "૨૮ જુલાઈ, ૨૦૨૪ ના રોજ, અમે રાષ્ટ્રપતિની ચૂંટણીમાં જંગી બહુમતીથી જીત મેળવી હતી." માછાદોએ વિપક્ષના ઉમેદવાર તરીકે પ્રાથમિક ચૂંટણી ૯૩% મતોથી જીતી હતી, પરંતુ શાસને તેમને ચૂંટણી લડવાથી પ્રતિબંધિત કર્યા હતા. આ પછી એક હિંમતવાન કારકિર્દી રાજદ્વારીએ તેમની જવાબદારી સંભાળી.
માછાદોએ કહ્યું, "અમે ૭૦% મતોથી જીત્યા અને અમે તે સાબિત પણ કરી શક્યા. અમે ૮૫% મૂળ ટેલી શીટ્સ એકઠી કરી અને તેને ડિજિટાઇઝ કરી. જીત બાદ અમે માદુરોને ગેરંટી સાથે મંત્રણા દ્વારા સંક્રમણની શક્યતા ઓફર કરી, પરંતુ તેમણે ઇનકાર કર્યો અને અમારા ઇતિહાસમાં સૌથી ખરાબ દમનનું મોજું શરૂ કર્યું. હજારો નિર્દોષ વેનેઝુએલાના લોકો ગુમ થઈ ગયા છે. બાળકો અને મહિલાઓ પર અત્યાચાર ગુજારવામાં આવ્યો, ત્રાસ આપવામાં આવ્યો અને હત્યા પણ કરવામાં આવી."
માછાદોએ યુએસ પ્રમુખ ડોનાલ્ડ ટ્રમ્પને વેનેઝુએલામાં લોકશાહીની લડાઈમાં "મુખ્ય સાથી" તરીકે ગણાવ્યા. તેમણે આશા વ્યક્ત કરી કે યુ.એસ. અને અન્ય દેશોના ગઠબંધન સાથે માદુરોને હવે સમજાયું છે કે તેનો સમય પૂરો થઈ ગયો છે.