પટણા: બિહાર વિધાનસભાની ચૂંટણી માટેનો પ્રચાર ચરમસીમાએ પહોંચ્યો છે, ત્યારે લાલુ પ્રસાદ યાદવની રાષ્ટ્રીય જનતા દળ (RJD) ને એક જ દિવસમાં બે મોટા આંચકા લાગ્યા છે. RJDના પૂર્વ રાજ્ય મહિલા અધ્યક્ષ પ્રતિમા કુશવાહા આજે પક્ષ છોડીને ભારતીય જનતા પાર્ટી (BJP) માં જોડાઈ ગયા છે, જ્યારે રાજૌલીના પૂર્વ ધારાસભ્ય વાનવરી રામ એ LJP (રામ વિલાસ) નો હાથ પકડ્યો છે.
રાજૌલીના પૂર્વ ધારાસભ્ય વાનવરી રામ RJDમાંથી ટિકિટ ન મળતા નારાજ હતા. LJP (રામ વિલાસ)માં જોડાયા બાદ તેમણે ખુલ્લેઆમ RJD પર આક્રોશ ઠાલવ્યો અને કહ્યું કે "RJD એ મને ટિકિટ આપવાનું વચન આપીને રડતો છોડી દીધો હતો. હવે મારો વારો છે; હું આ ચૂંટણીમાં RJD ને રડાવીશ."
તેમણે LJP (રામ વિલાસ) ના ઉમેદવાર વિમલ રાજવંશી સાથે જોડાઈને પ્રચાર શરૂ કરી દીધો છે.
ભાજપમાં જોડાનાર પ્રતિમા કુશવાહાએ પણ RJD પર ગંભીર આરોપો મૂક્યા છે. તેમણે કહ્યું કે, "લાલુ પ્રસાદ યાદવનો પક્ષ હવે પહેલા જેવો રહ્યો નથી." તેમણે ઉમેર્યું કે  "કેટલાક બહારના લોકો પાર્ટીમાં જોડાયા છે, જેના કારણે પરિવાર અને પાર્ટી બંને વિભાજીત થઈ ગયા છે."
તેમણે છઠી મૈયાના આશીર્વાદ માંગીને બિહારમાં NDA ગઠબંધનની સરકાર બને તેવી આશા વ્યક્ત કરી, જેથી વિકાસનું ચક્ર ઝડપથી આગળ વધે.
કેન્દ્રીય મંત્રી નિત્યાનંદ રાયે તેજસ્વી યાદવ પર પ્રહાર કરતા કહ્યું કે, "તેઓ ૨૦ મહિનામાં શું કરી શકે? તેઓ લૂંટફાટ કરશે, ગરીબોની જમીન હડપ કરશે, અથવા અપહરણ ઉદ્યોગ સ્થાપિત કરશે." જ્યારે અજય આલોકે તેજસ્વી યાદવના ભ્રષ્ટાચાર પર નિશાન સાધ્યું અને પટણાના મોલને ભ્રષ્ટાચારનો પુરાવો ગણાવ્યો.