નવી દિલ્હી: ભારતીય હવામાન વિભાગ (IMD) એ બંગાળની ખાડીમાં એક નવા ચક્રવાતી તોફાન 'મોંથા' ને લઈને મોટી ચેતવણી જાહેર કરી છે. આજે (૨૬ ઓક્ટોબર) દક્ષિણ પૂર્વ બંગાળની ખાડીમાં સર્જાયેલો લો પ્રેશર ઝોન ચક્રવાત મોંથામાં પરિવર્તિત થશે, જેની અસર ત્રણ દિવસ સુધી દરિયાકાંઠાના રાજ્યો પર જોવા મળશે.
 આ સિસ્ટમ પશ્ચિમ-ઉત્તરપશ્ચિમ તરફ આગળ વધશે અને ૨૭ ઓક્ટોબરની સવાર સુધીમાં ચક્રવાતી તોફાનનું રૂપ ધારણ કરશે.
 આગાહી મુજબ, તે ૨૮ ઓક્ટોબરની સાંજે અથવા રાત્રે આંધ્રપ્રદેશના મછલીપટ્ટનમ અને કલિંગપટ્ટનમ વચ્ચે કાકીનાડા નજીક લેન્ડફોલ થવાની શક્યતા છે.
હવામાન વિભાગે ચેતવણી આપી છે કે ચક્રવાત મોંથાના કારણે પવનની ગતિ ૧૧૦ કિલોમીટર પ્રતિ કલાક સુધી પહોંચી શકે છે.
 આંધ્રપ્રદેશ: ૨૬ થી ૨૯ ઓક્ટોબર સુધી રાજ્યમાં રેડ એલર્ટ જાહેર કરાયું છે. શ્રીકાકુલમથી તિરુપતિ સુધીના વિસ્તારોમાં ૧૦૦ મીમી સુધીનો ભારે વરસાદ અને જોરદાર પવન ફૂંકાઈ શકે છે.
 પશ્ચિમ બંગાળ: ૨૭ ઓક્ટોબરથી દરિયાકાંઠાના અને દક્ષિણ જિલ્લાઓમાં ભારે વરસાદની સંભાવના છે, જેમાં દક્ષિણ ૨૪ પરગણા અને મિદનાપુર જિલ્લાઓનો સમાવેશ થાય છે.
આંધ્રપ્રદેશના મુખ્યમંત્રી એન. ચંદ્રબાબુ નાયડુએ પરિસ્થિતિની ગંભીરતાને ધ્યાનમાં રાખીને તાત્કાલિક ઇમર્જન્સી બેઠક યોજી હતી અને તમામ જિલ્લા કલેક્ટરો અને વરિષ્ઠ અધિકારીઓને સતર્ક રહેવા અને જરૂરી તૈયારીઓ પૂર્ણ કરવા નિર્દેશ આપ્યો છે.