નવી દિલ્હી/ગુરુગ્રામ: હરિયાણવી સંગીત જગતમાં ખળભળાટ મચાવનાર ગાયક રાહુલ ફાઝિલપુરિયા પર ગોળીબાર કરવાના મુખ્ય સૂત્રધાર અને વોન્ટેડ ગેંગસ્ટર સુનિલ સરધાનિયા ને આખરે સ્વિટ્ઝર્લૅન્ડના ઝુરિચથી ભારત મોકલવામાં આવી રહ્યો છે. પોલીસ માટે આ એક મોટી સફળતા માનવામાં આવે છે.
પોલીસ સૂત્રોના જણાવ્યા અનુસાર, સુનિલ સરધાનિયા માત્ર ફાઝિલપુરિયા ગોળીબાર કેસમાં જ મુખ્ય આરોપી નથી, પરંતુ તે ગત વર્ષે ગુરુગ્રામના SPR રોડ પર થયેલી પ્રોપર્ટી ડીલર રોહિત શૌકિનની હત્યા માં પણ સામેલ છે. રોહિત શૌકિનની હત્યા બાદ ગેંગસ્ટર સુનિલ સરધાનિયાએ સોશિયલ મીડિયા પર તેની જવાબદારી પણ સ્વીકારી હતી. આ હત્યા ગેંગ વોર અને કરોડો રૂપિયાના વ્યવહારના વિવાદ સાથે જોડાયેલી હતી.
સૂત્રોના જણાવ્યા મુજબ, સરધાનિયા શરૂઆતમાં જેરુસલેમમાં હતો, જ્યાંથી તેને અટકાયતમાં લેવામાં આવ્યો અને ભારત પ્રત્યાર્પણની પ્રક્રિયા શરૂ કરવામાં આવી. હવે તેને સ્વિટ્ઝર્લૅન્ડના ઝુરિચથી ભારત મોકલાઈ રહ્યો છે.
હરિયાણવી ગાયક રાહુલ ફાઝિલપુરિયા પર થોડા મહિના પહેલા SPR રોડ પર બાઇક પર આવેલા હુમલાખોરોએ ગોળીબાર કર્યો હતો, જેમાં તે માંડ-માંડ બચી ગયો હતો. આ ગોળીબાર પાછળ પણ સુનિલ સરધાનિયા ગેંગનો હાથ હોવાનું તપાસમાં બહાર આવ્યું હતું.
ગુરુગ્રામ પોલીસે પુષ્ટિ આપી છે કે સરધાનિયાના ભારતમાં આગમન પર તેને તાત્કાલિક કોર્ટમાં રજૂ કરવામાં આવશે અને બંને ગંભીર ગુનાઓના સંદર્ભમાં ઊંડાણપૂર્વક પૂછપરછ માટે તેના રિમાન્ડની માંગણી કરવામાં આવશે. તેના પ્રત્યાર્પણથી મોટા ખુલાસા થવાની અપેક્ષા છે.