નવી દિલ્હી/કુઆલાલંપુર: દક્ષિણપૂર્વ એશિયન રાષ્ટ્રોના સંગઠન (ASEAN) માં ૩૫ વર્ષ પછી પહેલીવાર વિસ્તાર કરવામાં આવ્યો છે. પ્રદેશના સૌથી નાના અને ગરીબ રાષ્ટ્ર પૂર્વ તિમોર (તિમોર-લેસ્ટે) ને રવિવારે ઔપચારિક રીતે સંગઠનના સભ્ય તરીકે પ્રવેશ આપવામાં આવ્યો છે. દેશની વસ્તી માત્ર ૧.૪ મિલિયન છે.
કુઆલાલંપુરમાં આયોજિત ઔપચારિક સમારોહમાં પૂર્વ તિમોરના ધ્વજને અન્ય ૧૦ દેશોના ધ્વજ સાથે સ્ટેજ પર મૂકવામાં આવ્યો હતો. આ પ્રસંગે વડા પ્રધાન સંતાના ગુસ્માઓ એ જણાવ્યું કે, "આજે ઇતિહાસ રચાયો છે. તિમોર-લેસ્ટેના લોકો માટે, આ માત્ર એક સ્વપ્ન સાકાર થયું નથી પણ આપણી સફરનું એક શક્તિશાળી સમર્થન પણ છે."
 લાભ અને પ્રતિબદ્ધતા: વડા પ્રધાને ખાતરી આપી કે તેમનો દેશ ASEAN નો ઉપયોગી સભ્ય સાબિત થશે. તેમણે કહ્યું, "આ નવી શરૂઆત આપણા માટે વેપાર, રોકાણ, શિક્ષણ અને ડિજિટલ અર્થતંત્રમાં અપાર તકો લાવે છે."
ASEAN માં જોડાવા માટે માત્ર પૂર્વ તિમોર જ નહીં, પરંતુ બ્રાઝિલ પણ ઉત્સુક છે. બ્રાઝિલના રાષ્ટ્રપતિ લુઈઝ ઇનાસિયો લુલા દા સિલ્વાએ જણાવ્યું છે કે બ્રાઝિલ ASEAN ના સંપૂર્ણ સભ્ય બનવા માટે સક્રિયપણે કામ કરી રહ્યું છે.
આ દરમિયાન, ૨૬ થી ૨૮ ઓક્ટોબર દરમિયાન કુઆલાલંપુરમાં યોજાઈ રહેલી ૨૨મી ASEAN-ભારત સમિટમાં ભારતના વડા પ્રધાન નરેન્દ્ર મોદી વર્ચ્યુઅલી ભાગ લેશે, જેનાથી તેમની મલેશિયા મુલાકાતને લગતી અટકળોનો અંત આવ્યો છે.