બેતિયા, તા. ૨૬ ઓક્ટોબર, ૨૦૨૫ : બિહારના બેતિયા લોકસભા મતવિસ્તારના ભારતીય જનતા પાર્ટી (BJP)ના સાંસદ ડૉ. સંજય જયસ્વાલ પાસેથી અજ્ઞાત બદમાશો દ્વારા ₹૧૦ કરોડની જંગી રકમની ખંડણી (ફિરૌતી)ની માંગણી કરવામાં આવતાં ખળભળાટ મચી ગયો છે. ધમકી આપનારાઓએ સ્પષ્ટ ચેતવણી આપી છે કે જો આ રકમ નહીં ચૂકવવામાં આવે, તો તેમના પુત્રની હત્યા કરી દેવામાં આવશે.
SDPO વિવેક દીપે આ મામલાની પુષ્ટિ કરી છે. તેમણે જણાવ્યું કે સાંસદ ડૉ. સંજય જયસ્વાલને શુક્રવારે બપોરે ૧૨:૪૦ અને ૧૨:૪૪ વાગ્યે બે વખત ધમકીભર્યા ફોન કોલ આવ્યા હતા, જેમાં ખંડણીની માંગ કરવામાં આવી હતી.
પોલીસ તપાસમાં ટેકનિકલ ટીમો જોડાઈ
આ ગંભીર ગુનાની શ્રેણીમાં આવતા મામલામાં પોલીસે તાત્કાલિક કાર્યવાહી શરૂ કરી દીધી છે. SDPO વિવેક દેવના જણાવ્યા અનુસાર, પોલીસે અજ્ઞાત કોલ કરનારાઓના નંબરની ટ્રેસિંગ શરૂ કરી દીધી છે. આ મામલાની તપાસમાં સાયબર સેલ અને સ્પેશિયલ ઇન્વેસ્ટિગેશન ટીમ (SIT) ની પણ મદદ લેવામાં આવી રહી છે. કહેવામાં આવી રહ્યું છે કે સાંસદને અજાણ્યા નંબર પરથી આ કોલ કરવામાં આવ્યા હતા.
ડૉ. સંજય જયસ્વાલે ૨૦૦૯, ૨૦૧૪, ૨૦૧૯ અને ૨૦૨૪ની લોકસભા ચૂંટણીમાં જીત મેળવી છે. આ ઉપરાંત, તેમણે સપ્ટેમ્બર ૨૦૧૯ થી ૨૩ માર્ચ ૨૦૨૩ સુધી બિહારમાં ભાજપના પ્રદેશ અધ્યક્ષ તરીકે પણ સેવા આપી હતી. હાલમાં આ મામલે સાંસદ ડૉ. સંજય જયસ્વાલનો કોઈ સત્તાવાર નિવેદન આવ્યું નથી, કેમ કે તેમનો ફોન બંધ આવી રહ્યો છે. પોલીસ આ ધમકીને ગંભીરતાથી લઈને તપાસને ઝડપી બનાવી રહી છે.