મુંબઈ: મુંબઈના કાંદિવલી પશ્ચિમ વિસ્તારમાં રવિવારે સવારે મોટી દુર્ઘટના થતા થતા ટળી ગઈ હતી. શંકર લેન પર આવેલી અગ્રવાલ રેસિડેન્સી નામની ગ્રાઉન્ડ-પ્લસ-૧૬ માળની બહુમાળી રહેણાંક ઇમારતના બીજા માળે ભીષણ આગ લાગી હતી, જેના કારણે ગભરાટ ફેલાયો હતો. આ ઘટનામાં એક જ પરિવારના ૮ લોકો ઘાયલ થયા હતા.
આગ લાગ્યાની જાણ થતાં જ મુંબઈ ફાયર બ્રિગેડની ૬ ગાડીઓ તાત્કાલિક ઘટનાસ્થળે પહોંચી ગઈ હતી. ફાયર ટીમે બહાદુરીપૂર્વક સીડીઓ દ્વારા ૮ લોકોને બચાવ્યા.
 ઘાયલો: બચાવાયેલા લોકોમાં બે પુરુષો, ત્રણ મહિલાઓ અને ત્રણ બાળકોનો સમાવેશ થાય છે, જે બધા કોઠારી પરિવારના સભ્યો છે.
 ગંભીર હાલત: ઘાયલોને મલાડની તુંગા હોસ્પિટલમાં દાખલ કરવામાં આવ્યા છે. તેમાંથી ચિંતન કોઠારી (૪૫), ખ્યાતિ કોઠારી (૪૨) અને જ્યોતિ કોઠારી (૬૬) ની હાલત ગંભીર જણાતા તેમને ICU વોર્ડ માં રાખવામાં આવ્યા છે. જોકે ડોક્ટરોએ તેમની હાલત સ્થિર હોવાનું જણાવ્યું છે.
ફાયર બ્રિગેડના જણાવ્યા અનુસાર, આગ રૂમ નંબર ૨૦૫ માં ઇલેક્ટ્રિકલ વાયરિંગ, ઇન્સ્ટોલેશન અને લાકડાના ફર્નિચર સુધી મર્યાદિત હતી. જોકે, ધુમાડો ઝડપથી ફેલાતા શ્વાસ લેવામાં તકલીફ થઈ હતી. માત્ર ૨૦ મિનિટમાં આગ પર સંપૂર્ણ કાબુ મેળવી લેવામાં આવ્યો હતો.
પ્રારંભિક તપાસમાં આગ લાગવાનું કારણ ઇલેક્ટ્રિક શોર્ટ સર્કિટ હોવાની શંકા છે. પોલીસ અને ફાયર વિભાગ દ્વારા આગ લાગવાના ચોક્કસ કારણની તપાસ કરવામાં આવી રહી છે. ફાયર બ્રિગેડની તાત્કાલિક કાર્યવાહીને કારણે મોટી જાનહાનિ ટળી હતી.