લખનૌ: લખનૌ-આગ્રા એક્સપ્રેસવે પર આજે વહેલી સવારે એક મોટો અકસ્માત સર્જાયો હતો, જેમાં દિલ્હીથી ગોંડા જતી એક ડબલ ડેકર એરકન્ડિશન્ડ બસમાં ભીષણ આગ લાગી હતી. સદનસીબે, બસમાં સવાર તમામ ૩૯ મુસાફરોને સુરક્ષિત રીતે બહાર કાઢી લેવાયા હતા, જેના કારણે મોટી જાનહાનિ ટળી હતી.
આ ઘટના કાકોરી પોલીસ સ્ટેશન વિસ્તારમાં રેવાડી ટોલ પ્લાઝાથી લગભગ ૫૦૦ મીટર પહેલા સવારે ૪:૪૫ વાગ્યે બની હતી.
 બસના ડ્રાઇવર જગત સિંહે જણાવ્યું કે જ્યારે તેમણે બસના પાછળના ટાયરમાંથી ધુમાડો નીકળતો જોયો, ત્યારે તેમણે તુરંત બસ રોકી દીધી.
 ડ્રાઇવર અને કંડક્ટરની સમયસરની ચેતવણીને કારણે તમામ મુસાફરો આગ ભડકે તે પહેલાં જ બસમાંથી બહાર નીકળી શક્યા.
માહિતી મળતા જ ફાયર બ્રિગેડની ટીમ ઘટનાસ્થળે પહોંચી હતી. લગભગ એક કલાકની ભારે જહેમત બાદ આગ પર કાબુ મેળવાયો હતો, પરંતુ આગની તીવ્રતા એટલી હતી કે આખી બસની છત અને સીટો બળીને રાખ થઈ ગઈ હતી. પોલીસે પુષ્ટિ કરી છે કે કોઈ મુસાફરને ઈજા થઈ નથી.
પોલીસના પ્રાથમિક અનુમાન મુજબ, આગ લાગવાનું સંભવિત કારણ શોર્ટ સર્કિટ અથવા વધુ ગરમ થયેલા ટાયર હોઈ શકે છે. બસ માલિક શ્યામલાલ ગોલેએ મુસાફરોને તેમના ગંતવ્ય સ્થાન ગોંડા પહોંચાડવા માટે તાત્કાલિક બીજી બસની વ્યવસ્થા કરી હતી. એક્સપ્રેસવે પરનો ટ્રાફિક હવે સંપૂર્ણપણે સામાન્ય છે.