નવી દિલ્હી: ભારતે સંરક્ષણ ટેકનોલોજીમાં એક ક્રાંતિકારી પગલું ભરતા વાયુસેના માટે અત્યંત ઘાતક અને અદ્યતન સ્વોર્મ ડ્રોન સિસ્ટમ, કોલાબોરેટિવ લોંગ રેન્જ ટાર્ગેટ સેચ્યુરેશન/ડિસ્ટ્રક્શન (CLRTS/D), ને મંજૂરી આપી દીધી છે. સંરક્ષણ નિષ્ણાતો દ્વારા આ સિસ્ટમને ભારતનું 'મોર્ડન યમરાજ' ગણાવવામાં આવી રહ્યું છે, જે ૧,૧૦૦ કિલોમીટર અંદર સુધી ઘૂસીને દુશ્મન પર વિનાશ વેરવામાં સક્ષમ છે.
 ડીપ સ્ટ્રાઇક ક્ષમતા: આ ડ્રોન પાકિસ્તાન અથવા અન્ય દુશ્મન પ્રદેશમાં ૧,૧૦૦ કિમી સુધી ઘૂસીને ચોક્કસ લક્ષ્યો પર હુમલો કરી શકે છે.
 સ્વાયત્ત સંચાલન: આ ડ્રોન માનવ નિયંત્રણ વિના કાર્ય કરી શકે છે અને અત્યાધુનિક ઇલેક્ટ્રોનિક જામિંગ વાતાવરણ માં પણ તેનું મિશન ચાલુ રાખવા સક્ષમ છે.
 સ્વોર્મ ટેકનોલોજી: આ સિસ્ટમ સેંકડો ડ્રોનને એકસાથે ઉડવા અને દુશ્મનના ઠેકાણાં, હવાઈ સંરક્ષણ પ્રણાલીઓ, રડાર, પાવર ગ્રીડ અને સંદેશાવ્યવહાર નેટવર્ક પર મોટા પાયે અને સંતૃપ્તિ હુમલા (Saturation Attacks) કરવા સક્ષમ બનાવે છે.
આ ડ્રોન ટેકનોલોજીમાં અદ્યતન AI નો ઉપયોગ કરવામાં આવ્યો છે:
 લક્ષ્ય નાશક ડ્રોન: ૮૦% ડ્રોન ટોપ-એટેક અને શેલ્ટર પેનિટ્રેશન જેવા વિશિષ્ટ વોરહેડ્સથી સજ્જ હશે.
 રીઅલ-ટાઇમ સર્ચ: બાકીના ૨૦% ડ્રોન AI-સક્ષમ સેન્સર સિસ્ટમ (DSMAC) થી સજ્જ હશે, જે GPS વિના પણ દુશ્મનની સ્થિતિ શોધી કાઢશે અને ડેટા ટ્રાન્સમિટ કરશે. આ ડ્રોન સ્વદેશી પ્રોપલ્શન યુનિટ્સ અને INS/IRNSS નેવિગેશન ટેકનોલોજીથી ચાલે છે.
આ પ્રોજેક્ટ DRDO ના એરોનોટિકલ ડેવલપમેન્ટ એસ્ટાબ્લિશમેન્ટ (ADE) દ્વારા સંચાલિત કરવામાં આવશે, જેમાં HAL, BEL, TASL, પારસ ડિફેન્સ જેવી અગ્રણી ભારતીય કંપનીઓ સહયોગ કરશે. સમગ્ર નિર્માણ "મેક ઇન ઇન્ડિયા" પહેલ હેઠળ થશે, જેનાથી ભારત વિશ્વના એવા થોડા દેશોમાં સામેલ થઈ જશે જે સ્વોર્મ ડ્રોન-આધારિત લડાઇ પ્રણાલી ચલાવવા માટે સક્ષમ છે.