જમૈકા : વર્ષ 2025ના અત્યાર સુધીના સૌથી ખતરનાક ચક્રવાત મેલિસા (Melissa) એ સંપૂર્ણ તાકાત સાથે વિનાશ વેરવાનું શરૂ કરી દીધું છે. દરમિયાન, યુએસ એરફોર્સ દ્વારા રેકોર્ડ કરાયેલો એક વિડિઓ સોશિયલ મીડિયા પર વાયરલ થઈ રહ્યો છે, જે એટલાન્ટિક મહાસાગર પર પ્રચંડ તોફાનનું ભયાનક દ્રશ્ય રજૂ કરે છે.

હરિકેન હન્ટર્સનું સાહસ
યુએસ એરફોર્સની પ્રખ્યાત 53મી વેધર રિકોનિસન્સ સ્ક્વોડ્રન, જેને "હરિકેન હન્ટર્સ" તરીકે ઓળખવામાં આવે છે, તેમણે સોમવારે તોફાનના કેન્દ્ર (Eye) માં એક વિમાન ઉડાડીને ડેટા એકત્રિત કર્યો હતો.

વાયરલ વીડિયોમાં ચક્રવાત મેલિસા ગર્જના કરતો અને એક વિકરાળ શિકારીની જેમ આકાશમાં કૂદતો જોવા મળે છે.
આ ફૂટેજ ત્યારે રેકોર્ડ કરવામાં આવ્યું જ્યારે વાવાઝોડું જમૈકા નજીક આવી રહ્યું હતું.

આ વિડિયો જોનાર લોકો કહી રહ્યા છે કે, "વાવાઝોડું આ પ્રકારનું દેખાય છે," જે મેલિસાની ભયાનકતા દર્શાવે છે.

કેટેગરી 5નું તોફાન, અનેક દેશોમાં વિનાશ

ચક્રવાત મેલિસા હવે કેટેગરી 5નું વાવાઝોડું બની ગયું છે.
નેશનલ હરિકેન સેન્ટર (NHC) અનુસાર, મેલિસાની મહત્તમ પવનની ગતિ 175 mph (લગભગ 280 kmph) સુધી પહોંચી ગઈ છે.
જમૈકા સહિત અન્ય કેરેબિયન દેશો અને ટાપુઓમાંથી હજારો લોકોનું સ્થળાંતર કરવામાં આવી રહ્યું છે.
નિષ્ણાતોએ મેલિસાને કારણે વિનાશક પૂર, ભૂસ્ખલન અને વ્યાપક વિનાશ થવાની શંકા વ્યક્ત કરી છે.

વાવાઝોડું જમૈકા પહોંચે તે પહેલા જ, હૈતીમાં ઓછામાં ઓછા ત્રણ લોકોના અને જમૈકામાં પણ ત્રણ લોકોના મોતની પુષ્ટિ થઈ છે. ડોમિનિકન રિપબ્લિકમાં પણ જાનહાનિના સમાચાર છે.