કોલીંગ નેમ પ્રેઝન્ટેશન : અજાણ્યા કોલના નંબર સાથે નામ પણ આવશે
ગ્રાહકોની સુરક્ષાને ધ્યાનમાં રાખી ટ્રાય અને દુરસંચાર વિભાગનો મહત્વપુર્ણ નિર્ણય તમામ ટેલીકોમ કંપનીઓ કોઇ પણ એક સર્કલમાં સેવા શરૂ કરશેઃ ૬૦ દિવસ રહેશે ટ્રાયલ પીરીયડ
નવી દિલ્હી : ટેલિકોમ ક્ષેત્રમાં ગ્રાહકોની સુરક્ષાને ધ્યાનમાં રાખીને TRAI અને DoT એ મહત્વપૂર્ણ નિર્ણય લીધો છે. હવે જ્યારે કોઈ અજાણ્યા નંબરથી કોલ આવશે, ત્યારે કોલ કરનારનો નંબર અને નામ બંને તમારા મોબાઇલ સ્ક્રીન પર દેખાશે, અને તે માટે કોઈ અલગ એપ્લિકેશન ડાઉનલોડ કરવાની જરૂર નહીં રહે.
આ સેવા ‘કોલિંગ નેમ પ્રેઝન્ટેશન (CNAP)' નામથી શરૂ કરવામાં આવી રહી છે. આ સિસ્ટમથી ગ્રાહકો સરળતાથી ઓળખી શકશે કે તેમને કોણ ફોન કરી રહ્યું છે, જેના કારણે ફેક કોલ, નાણાકીય છેતરપિંડી અને સાયબર ફ્રોડની સંભાવના ઘટશે.
DoT એ ટેલિકોમ કંપનીઓને સૂચના આપી છે કે તેઓ એક અઠવાડિયામાં પોતાના પસંદગીના એક સર્કલમાં આ સેવા શરૂ કરે. આ સેવા માટે ૬૦ દિવસનો ટ્રાયલ પિરિયડ રાખવામાં આવશે, અને તે સફળ રીતે ચાલ્યા બાદ દેશભરમાં અમલ કરવામાં આવશે.
ટેલિકોમ કંપનીઓએ દર અઠવાડિયે સરકારને અહેવાલ સબમિટ કરવાના રહેશે, જેથી પ્રોજેક્ટની કામગીરી અને સમસ્યાઓની સમીક્ષા થઈ શકે. ગયા વર્ષે મુંબઈ અને હરિયાણા સર્કલમાં આ સેવાનું ટ્રાયલ સફળતાપૂર્વક હાથ ધરવામાં આવ્યું હતું.
ફેબ્રુઆરી ૨૦૨૪માં TRAI એ DoT ને ભલામણ કરી હતી કે CNAP સેવા માત્ર ગ્રાહકની વિનંતી પર જ સક્રિય કરવી જોઈએ. પરંતુ DoT એ તેના પ્રતિસાદમાં જણાવ્યું હતું કે આ સેવા ડિફોલ્ટ રૂપે ચાલુ રાખવી જોઈએ, અને જો કોઈ યુઝર ઇચ્છે તો તેને બંધ કરવાનું ઓપ્શન હોવું જોઈએ. આ અભિપ્રાય પર હવે TRAI એ પણ સંમતિ આપી છે, એટલે હવે બંને વિભાગો એકમત થયા છે. આ રીતે દેશભરમાં કોલરનું નામ દર્શાવવાની ડિફોલ્ટ સુવિધા લાગુ થશે, જેનાથી કોલ ફ્રોડની ઘટનાઓમાં મોટો ઘટાડો થવાની શકયતા છે.
જેઓ કોલિંગ લાઇન આઇડેન્ટિફિકેશન રિસ્ટ્રિક્શન (CLIR) સુવિધાનો ઉપયોગ કરે છે, તેમનું નામ કોલ રિસીવ કરતી વખતે દેખાશે નહીં. આ સુવિધા ખાસ કરીને કેન્દ્રીય ગુપ્તચર એજન્સીઓ, VIP વ્યક્તિઓ અને તપાસ અધિકારીઓને પૂરી પાડવામાં આવે છે. ટેલિકોમ કંપનીઓ CLIR માટે અરજી કરનાર સામાન્ય ગ્રાહકોની સંપૂર્ણ ચકાસણી કરશે. નોંધનીય છે કે કોલ સેન્ટર, ટેલિમાર્કેટર અને બલ્ક કનેક્શન ધરાવતા ગ્રાહકો આ સુવિધાનો લાભ લઈ શકશે નહીં.
(11:10 AM IST)
છેલ્લા 8 દિવસમાં સૌથી લોકપ્રિય 
