જમ્મુ: આ વર્ષે ઓગસ્ટ મહિનામાં કિશ્તવાડ જિલ્લામાં આવેલા મચેલ માતાના બેઝ કેમ્પ નજીક ચશોતી વિસ્તારમાં વાદળ ફાટવાની દુર્ઘટનામાં જે ૩૧ લોકો લાપતા થયા હતા, તેમને હવે બે મહિનાની અંદર જ મૃત જાહેર કરવાની પ્રક્રિયા શરૂ કરવામાં આવી છે. સામાન્ય રીતે ૭ વર્ષની કાયદાકીય પ્રક્રિયાનું પાલન કર્યા વિના, આપત્તિની સ્થિતિના પરિપત્રોના આધારે આ નિર્ણય લેવાયો છે.

સબ-ડિવિઝનલ મેજિસ્ટ્રેટ ડૉ. અમિત કુમારના જણાવ્યા મુજબ, મૃત જાહેર કરવાની પ્રક્રિયામાં લગભગ બે મહિના લાગશે. આ માટે મેજિસ્ટ્રેટ અને પોલીસ દ્વારા સંયુક્ત તપાસ કરવામાં આવશે અને ત્યારબાદ કેસ જિલ્લા મેજિસ્ટ્રેટને મોકલવામાં આવશે. 

તેમણે જણાવ્યું કે, ઉત્તરાખંડ અને ૨૦૧૪ના કાશ્મીર પૂર જેવી આપત્તિની સ્થિતિમાં મળેલા આદેશોના આધારે આ પ્રક્રિયા ટૂંકાવવામાં આવી છે.

એસ.ડી.એમ. દ્વારા એક ૩૦ દિવસનું જાહેર નોટિસ પણ આપવામાં આવ્યું છે, જેમાં પરિવારના સભ્યો, સરકારી વિભાગો અથવા અન્ય કોઈ સંબંધિત વ્યક્તિને કોઈપણ દાવા કે વાંધા હોય તો રજૂ કરવા જણાવાયું છે. 

લાપતા લોકોને મૃત જાહેર કરવાની આ ઘોષણા લાંબા સમયથી ચાલી રહેલા શોધ અભિયાનનો દુઃખદ અંત લાવશે.