પટના: બિહાર વિધાનસભા ચૂંટણી દરમિયાન બક્સર જિલ્લામાં એક મોટી હિંસાની ઘટના સામે આવી છે. ભારતીય જનતા પાર્ટીના સાંસદ અને સ્ટાર પ્રચારક મનોજ તિવારી અને NDA ઉમેદવાર રાહુલ સિંહ પર હુમલો કરવામાં આવ્યો હતો, જેમાં બંને માંડ-માંડ બચી ગયા હતા.
 મનોજ તિવારી બક્સરના ડુમરાવ વિધાનસભા મતવિસ્તારમાં NDA ઉમેદવારના રોડ શોમાં ભાગ લઈ રહ્યા હતા, ત્યારે આ હુમલો થયો હતો.
 સાંસદ તિવારીએ આખી ઘટનાની વિગતો આપીને તાત્કાલિક ચૂંટણી પંચ અને બક્સર જિલ્લા વહીવટીતંત્રને જાણ કરી છે.
આ ઘટના બાદ રાજકીય માહોલ ગરમાયો છે. દિલ્હી સરકારના આરોગ્ય અને પરિવહન મંત્રી ડૉ. પંકજ સિંહે સીધો આરોપ લગાવ્યો કે RJD (રાષ્ટ્રીય જનતા દળ) હિંસાનો આશરો લઈને ચૂંટણી જીતવા માંગે છે. તેમણે કહ્યું કે RJD ૧૯૯૦ થી ૨૦૦૫ વચ્ચેના 'જંગલ રાજ' જેવું શાસન ફરી સ્થાપિત કરવા માગે છે.
બક્સરની ઘટના ઉપરાંત, બિહારના ફોર્બ્સગંજ વિધાનસભા મતવિસ્તારમાં અન્ય એક ચોંકાવનારી ઘટના બની.
 સિમરાહામાં અપક્ષ ઉમેદવાર રાજારમણ ભાસ્કર ઉર્ફે રંતુ મંડલ દ્વારા આયોજિત જાહેર સભામાં લોકપ્રિય ભોજપુરી નૃત્યાંગના માહી મનીષાને પર્ફોર્મ કરવા આમંત્રણ આપવામાં આવ્યું હતું.
 જોકે, માહી મનીષા સ્ટેજ પર ઉતરતાની સાથે જ હજારો દર્શકોની ભીડ બેકાબૂ થઈ ગઈ અને સ્ટેજ તરફ ધસી આવી.
 પરિસ્થિતિ એટલી વણસી ગઈ કે સુરક્ષાના કારણોસર માહી મનીષાને પર્ફોર્મન્સ અધૂરું મૂકીને સ્ટેજ છોડવાની ફરજ પડી હતી.
ભીડને કાબૂમાં લેવા માટે હાજર વહીવટી ટીમે સંઘર્ષ કર્યો અને ઘણી વખત લાઠીચાર્જ કરવો પડ્યો. ભીડમાં ધક્કામુક્કી અને દોડધામની સ્થિતિ સર્જાઈ હોવાનું જાણવા મળ્યું છે. હાલમાં વહીવટીતંત્રે પરિસ્થિતિને શાંત કરી દીધી છે અને સમગ્ર મામલાની સમીક્ષા કરી રહ્યું છે.