નવી દિલ્‍હી તા.૪: વેપાર કરવા માટે નવો જીએસટી નંબર મેળવવા માટે અનેક લોકોને ઇન્‍સ્‍પેક્‍ટર રાજનો અનુભવ થતો હતો. તે અંગેની વ્‍યાપક ફરિયાદ બાદ જીએસટી કાઉન્‍સિલે અનેક સુપાશ કરવા ઉપરાંત ત્રણ દિવસમાં નવો નંભર મળી જાય તેવી વ્‍યવસ્‍થા ઊભી કરી દીધી છે. તેનો અમલ ૧ નવેમ્‍બરથી કરી દેવામાં આવતા અનેક લોકોને રાહતનો અનુભવ થયો છે. કારણ કે હવેથી જીએસટી નંબર મેળવવા માટે અરજી કરનારને વધુમાં વધુ ત્રણ દિવસમાં નવો નંબર ફાળવી દેવામાં આવનાર છે.

જે વેપારીએ દર મહિને ૨.૫૦ લાખ રૂપિયા કરતાં ઓછો ટેક્‍સ ભરવાનો થતો હોય તેવા વેપારીઓને ત્રણ દિવસમાં નવો નંબર આપવાના નિયમનું અમલીકરણ શરૂ કરી દેવામાં આવ્‍યું છે. જોકે તેના માટે વેપારીએ નવી નંબર મેળવવા માટે અરજી કરતી વખતે ૨.૫૦ લાખ રૂપિયા કરતાં ઓછો ટેક્‍સ અમારા વેપારમાં આવશે તેવી બાંહેધરી આપવાની રહેશે. આ પ્રમાણેની અરજી કરવામાં આવ્‍યા બાદ ઓનલાઈન જ તમામ કાર્યવાહી અને ચકાસણી કરવામાં આવ્‍યા પછી વેપારીના મોબાઈલ અને ઈમેઈલ પર આધારકાર્ડ અપલોડ કરવાની એક લિક મોકલવામાં આવશે તેમાં આધારકાર્ડ અપલોડ કરવામાં આવ્‍યાના ગણતરીની મિનિટમાં જ નવા નંબરની ફાળવણી કરી દેવામાં આવનાર છે. આ નિયમ ૧ નવેમ્‍બરથી લાગુ કરી દેવામાં આવ્‍યો છે, તેમાં એક નવેમ્‍બરના રોજ નવા નિયમ હેઠળ અરજી કરનાર વેપારીને વધુમાં વધુ ૫૦ મિનિટમાં નવા નંબરની ફાળવણી કરી દેવામાં આવી હોવાની વિગતો જાણવા મળી છે.