કાશ્મીરમાં વરસાદ હિમવર્ષાથી ઠંડીમાં વધારોઃ ગુલમર્ગ સોનમર્ગ સફેદ ચાદરમાં લપેટાયા
હિમવર્ષા જોવા આવેલા પ્રવાસીઓના ચહેરા પર ખુશીની લહેર ફેલાઈ ગઈ
શ્રીનગર,તા.૦૫: કાશ્મીર ખીણના ઉપરના ભાગોમાં હિમવર્ષા અને મંગળવારે સાંજે મેદાની વિસ્તારોમાં છૂટાછવાયા વરસાદથી હવામાનમાં પલટો આવ્યો અને તાપમાનમાં તીવ્ર ઘટાડો થયો. હવામાનમાં અચાનક ફેરફારથી ખીણમાં ઠંડીમાં વધારો થયો છે. સોનમર્ગ, ગુલમર્ગ, દૂધપથરી અને યુસમર્ગના પહાડી વિસ્તારોમાં મોડી સાંજે હિમવર્ષા શરૂ થઈ, જેનાથી આ સુંદર ખીણો સફેદ ચાદરમાં ઢંકાઈ ગઈ. હિમવર્ષા જોવા આવેલા પ્રવાસીઓના ચહેરા પર ખુશીની લહેર ફેલાઈ ગઈ. પ્રવાસીઓએ જણાવ્યું હતું કે હિમવર્ષાથી કાશ્મીરમાં હવામાં તાજગી આવી છે.
અધિકારીઓએ જણાવ્યું હતું કે સાધના પાસ અને નિયંત્રણ રેખા (LoC) નજીકના વિસ્તારોમાં પણ કુપવાડાના ઊંચાઈવાળા વિસ્તારોમાં બરફવર્ષા થઈ હતી. હોટલ માલિક નિયાઝ અહેમદે જણાવ્યું હતું કે, પહલગામ હુમલા પછી પ્રવાસન ક્ષેત્રને મોટું નુકસાન થયું છે. હોટલો ખાલી હતી અને બુકિગ રદ કરવામાં આવ્યા હતા, પરંતુ અમને આશા છે કે આ હિમવર્ષાથી પરિસ્થિતિમાં સુધારો થશે અને મોટી સંખ્યામાં સ્થાનિક અને વિદેશી પ્રવાસીઓ કાશ્મીર પાછા ફરશે.
હવામાન વિભાગના એક અધિકારીએ જણાવ્યું હતું કે બુધવાર સવાર સુધી ખીણમાં વરસાદ અને બરફવર્ષા ચાલુ રહેવાની શક્યતા છે. તેમણે કહ્યું હતું કે તાજી હિમવર્ષાથી ગુલમર્ગ, સોનમર્ગ અને અન્ય પ્રવાસન સ્થળો બરફના હળવા સ્તરથી ઢંકાઈ ગયા છે, જ્યારે તાપમાનમાં ત્રણથી ચાર ડિગ્રીનો ઘટાડો થયો છે.
દરમિયાન, શ્રીનગર, બારામુલ્લા, બડગામ અને અનંતનાગ સહિતના મેદાની વિસ્તારોમાં સાંજે વરસાદ શરૂ થયો હતો, જેનાથી ઠંડી વધુ તીવ્ર બની હતી. બજારોમાં ગરમ કપડાં, હીટર અને કોલસાની માંગમાં વધારો થયો છે. સ્થાનિક લોકોએ જણાવ્યું હતું કે છેલ્લા કેટલાક અઠવાડિયાથી હવામાન શુષ્ક અને કંઈક અંશે ખુશનુમા હતું, પરંતુ તાજી હિમવર્ષા અને વરસાદથી ખીણમાં શિયાળાના નિયમિત આગમનનો અહેસાસ થયો છે. પ્રવાસન વિભાગના એક અધિકારીએ આશા વ્યક્ત કરી હતી કે હિમવર્ષા પ્રવાસન પ્રવૃત્તિઓને પુનર્જીવિત કરશે. તેમણે કહ્યું કે શિયાળાની પહેલી હિમવર્ષા હંમેશા ખીણ માટે શુભ માનવામાં આવે છે, કારણ કે તે કાશ્મીરના કુદરતી સૌંદર્યમાં એક નવું પરિમાણ ઉમેરે છે અને પ્રવાસીઓને આકર્ષે છે.
(9:58 AM IST)
છેલ્લા 8 દિવસમાં સૌથી લોકપ્રિય 
