ટેક્સસમાં પૈસા આપી છોકરી સાથે મજા કરવા ગયેલા ત્રણ ઈન્ડિયન્સ ઝડપાયા
પોલીસે હાથ ધરેલા સ્ટિંગ ઓપરેશનમાં ત્રણ તેલુગુ યુવકોની ધરપકડ, ગુનો સાબિત થાય તો થઈ શકે છે બે વર્ષ સુધીની જેલ
ટેક્સસ તા.૫: ટેક્સસના ઈરવિંગમાં પોલીસ દ્વારા હાથ ધરવામાં આવેલા એક સ્પેશિયલ સ્ટિંગ ઓપરેશનમાં ત્રણ ઈન્ડિયન્સ સહિત કુલ દસ લોકોની ધરપકડ કરવામાં આવી છે. આ તમામ લોકો પૈસા આપીને શરીર સુખ માણવા માટે ગયા હતા પરંતુ પોલીસે તે ઠેકાણા પર રેડ કરતા તેમને જેલમાં જવાનો વારો આવ્યો હતો. ઓક્ટોબર ૧૪ની આ ઘટનામાં જે ત્રણ ઈન્ડિયન્સ પકડાયા છે તેમાં શશી કુનચી, સાઈ હેમંત ને મનોહરચારી શ્રીરામુલાનો સમાવેશ થાય છે. આ ત્રણેય શોખીનોની ઉંમર ૨૮થી ૩૦ વર્ષની હોવાનું પોલીસ દ્વારા જણાવવામાં આવ્યું છે.
આ સ્ટિંગ ઓપરેશનમાં અંડરકવર ઓફિસર્સે મસાજ પાર્લરથી લઈને ઓનલાઈન એડવર્ટાઈઝ કરતા હોય તેવા વિવિધિ લોકેશન્સ પર કાર્યવાહી કરી હતી જેમાંથી ૧૦ લોકો રંગરેલીયા મનાવતા રંગેહાથ પકડાઈ ગયા હતા. જે ઈન્ડિયન્સ આ કાર્યવાહીમાં અરેસ્ટ થયા છે તે તમામ તેલુગુ છે, જોકે તેઓ કયા સ્ટેટસ પર અમેરિકામાં હતા તેની કોઈ ચોક્કસ વિગતો નથી મળી શકી પરંતુ તેમની ઉંમરને જોતા તેઓ સ્ટૂડન્ટ કે પછી H-1B વિઝા પર હોઈ શકે છે.
ટેક્સસમાં જે ત્રણ ઈન્ડિયન્સની સોલિસિટેશન ઓફ પ્રોસ્ટિટ્યૂશનના ચાર્જમાં ધરપકડ કરવામાં આવી છે તે એક ગંભીર ગુનો છે. આ ચાર્જમાં જો કોઈની પહેલીવાર ધરપકડ થઈ હોય તો પણ તે ફેલોની ગણાય છે અને તેમાં કસૂરવાર સાબિત થવા પર બે વર્ષ સુધીની જેલ અને દસ હજાર ડોલર જેટલો દંડ થઈ શકે છે. આ કાયદા હેઠળ જાણીજોઈને પૈસા ચૂકવી કોઈની સાથે શારીરિક સંબંધ બાંધવો ગુનો છે. જો પૈસાની ચૂકવણી ના થઈ હોય તો પણ તેના વિશે વાત થઈ હોય કે પછી આમ કરનારે પૌસ ચૂકવવા તૈયારી બતાવી હોય તો પણ તેની ધરપકડ થઈ શકે છે.
ફેલોની ચાર્જમાં ધરપકડ થઈ હોવાથી હવે આ ત્રણેય ઈન્ડિયન્સના માથે ડિપોર્ટેશનની તલવાર પણ લટકી રહી છે, કારણકે ટેક્સસ તો રિપબ્લિકન સ્ટેટ હોવાથી કોઈપણ ગુનો કરનારા નોન-સિટીઝનનો તુરંત જ ICEને રિપોર્ટ કરી દેવાય છે. ઘણા કેસમાં તો જો લોકલ પોલીસે આરોપીને અરેસ્ટ કરી રિલીઝ કરી દીધો હોય તો પણ તે કોર્ટમાં હાજરી આપવા આવે ત્યારે પણ ICE દ્વારા તેની ધરપકડ થઈ શકે છે.
આ પ્રકારના કેસમાં આરોપીનું નિર્દોષ છૂટવું અશક્ય નહીં તો મુશ્કેલ ચોક્કસ છે કારણકે પોલીસે મજબૂત પુરાવાના આધારે તેમની ધરપકડ કરી હોય છે અને કૂટણખાના જેવી જગ્યાએથી પકડાયેલા આરોપી માટે પોતે ત્યાં પૈસા આપીને શરીર સુખ માણવા નહોતો ગયો તેવું પુરવાર કરવું પણ મુશ્કેલ બની જાય છે. જો આવા આરોપી અથવા કસૂરવારને તાત્કાલિક ડિપોર્ટ કરવામાં ના આવે તો પણ તેનો ક્રિમિનલ રેકોર્ડ કાયમ માટે રહે છે અને તેની અસર તેના ઈમિગ્રેશન કેસ પર પડે છે.
મતલબ કે આવા લોકોને વિઝા રિન્યૂ કરાવવામાં કે પછી આગળ જતાં ગ્રીન કાર્ડ અથવા સિટીઝનશિપ લેવામાં તકલીફ પડી શકે છે. તો બીજી તરફ મહત્તમ સજાથી બચવા માટે જો કોઈ ગુનો સ્વીકારી લે તો તેને સજા ભલે ઓછી થાય પણ સેક્સ્યુઅલ ઓફેન્ડર તરીકે નામ રજિસ્ટર્ડ થઈ જતાં અમેરિકામાં સારી જોબ શોધવું મુશ્કેલ બની જાય છે. હાલના દિવસોમાં જેમને ક્રિમિનલ્સ ગણાવીને ડિપોર્ટ કરવામાં આવી રહ્યા છે તેમાંના ઘણા આવા જ ક્રાઈમમાં અરેસ્ટ થયા હતા કે પછી તેમની સામેના આરોપ કોર્ટમાં સાબિત થયા હતા.(૩૮.૭)
(10:15 AM IST)
છેલ્લા 8 દિવસમાં સૌથી લોકપ્રિય 
